Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 287 Hüküm no: 316 Orijinal metin no: [28a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Ebubekir’in, evinin yarısını ölünceye kadar kendisine bakmaları şartıyla Ebubekir Beşe ile hanımı Hatice’ye satmasının nizamen geçersiz olduğu Ma‘rûz Medîne-i Üsküdar’da Selami mahallesinde sâkine mu‘arrefetü’z-zât Fatıma bt. Ebûbekir nâm hatun medîne-i mezbûrede mahfil-i bâbda meclis-i şer‘-i hatîrde Ebûbekir Beşe b. İbrahim ile mu‘arrefetü’z-zât Hadice bt. Abdurrahman nâm zevcân mahzarlarında medîne-i mezbûrede vâki‘ merhûm eş-Şeyh Selami Ali Efendi vakfının mütevellîsi eş-Şeyh Hafız Mehmed Efendi tarafından vekîl-i şer‘îsi ve vakf-ı mezbûrun kâtibi Mustafa Efendi hâzır olduğu hâlde ben târih-i i‘lâmdan dokuz ay mukaddem mahalle-i mezbûrede vâki‘ vakf-ı mezbûr musakkafâtından olup ma‘lûmü’l-hudûd ve’l-müştemilât bir bâb vakıf menzilimin nısfını beni ölünce görüp gözetmek şartıyla zevcân-ı mezbûrâna ale’l-iştirâki’s-seviyy bâ-ma‘rifet-i mütevellî ferâğ ve tefvîz etmiş idim lâkin ferâğ-ı mezkûr şartla olup ve bu makūle şartla olan ferâğ sahîh ve mu‘teber olmamağla zevcân-ı mezbûrâna suâl olunup nısf menzil-i mezkûrdan kasr-ı yedlerine tenbîh olunmak matlûbumdur deyü da‘vâ ettikde onlar dahi cevâblarında ber-vech-i muharrer ikrâr ü i‘tirâf etmeğin mûcebiyle zevcân-ı mezbûrân nısf menzil-i mezkûrdan kasr-ı yed birle cânib-i vakıfdan müdde‘iye-i mezbûre uhdesine kemâ-fi’l-evvel tahrîr ve temhîre vekîl-i mezbûra tenbîh olunduğu bi’l-iltimâs huzûr-ı âlîlerine i‘lâm olundu. Fî 16 min-Zilhicce sene 1204