Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 291 Hüküm no: 324 Orijinal metin no: [28b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Mehmed’in nizama aykırı kiriş imalinden dolayı men edilmesi talebi Ma‘rûz Medîne-i Üsküdar hâricinde Atik Haydarpaşa kurbünde vâki‘ kirişhânede sâkin kirişçi esnâfının kethudâları Ömer Ağa b. İsmail ve ustalarından es-Seyyid Ahmed Ağa b. Mehmed Emin ve es-Seyyid Mehmed Ağa b. Hüseyin ve Hafız Süleyman Efendi b. Mustafa ve Abdulkadir b. Yusuf ve es-Seyyid Hasan b. Mustafa nâm kimesneler medîne-i mezbûrede mahfil-i bâbda meclis-i şer‘-i hatîrde Bostanî Mehmed b. Hasan nâm kimesne mahzarında ez-kadîm kirişhânemizde i‘mâl eylediğimiz kiriş beş kat ve bunları mu‘tâd-ı kadîm üzere kesile gelip ve taşradan gelen kalb kirişleri alıp ıslâh ve i‘mâl olunmamak şurût-ı nizâmımızdan iken bu esnâda mezbûr Bostanî Mehmed tama‘-ı hâmından nâşi i‘mâl eylediği kirişi dört kat ve boyları mu‘tâd üzere olmayıp nâkıs kesip ve taşradan gelen kalb kirişleri dahi ıslâh ve i‘mâl edip bizim san‘atımız fenâ bulduğuna binâen bi’d-defa‘ât kendiye nush ü pend eylediğimizde mütenassıh olmayıp ef‘âl-i kabîhasında ısrâr ve mezbûr Bostanî Mehmed mugāyir-i şurût-ı nizâm hareket etmekle bu vechile nizâm-ı kadîmlerimizin ihtilâline bâ‘is ü bâdî olur deyü muvâcehesinde teşekkî ve fîmâ-ba‘d esnâf-ı mezkûre fukarâsını siyâneten mezbûr Bostanî Mehmed’in mugāyir-i nizâm hareket etmemek için fermân-ı âlîleri sudûrunu herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 23 min-M sene 1205