Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 292 Hüküm no: 327 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. Yasef’in kendisini kurşunla yaralayan Çoban Yuvan’a açtığı davada sulh olduğu Ma‘rûz Mevâdd-ı şer‘iye istimâ‘ı’çün kıbel-i şer‘-i şerîfden meb‘ûs Abdullah Efendi dâ‘îleri medîne-i Üsküdar’a tâbi‘ Kuzguncuk karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde karye-i mezbûrede mütemekkin ve ber-vech-i âtî kurşun yarasıyla mecrûh idiği bundan akdem lede’l-keşf ve’l-mu‘âyene zâhir olan İsak v. Yasef nâm Yahûdî meclis-i ma‘kūd-ı mezkûrda çoban tâifesinden Yuvan v. İstiko tarafından ber-vech-i âtî vekîli olan Lazari v. Pohli nâm zimmî muvâcehesinde merkūm Yuvan zimmî târih-i i‘lâmdan altı gün mukaddem karye-i mezbûre hâricinde vâki‘ kendi bağımda bi-gayrı hakkın kurşun ile sol kolum üzerine darb ve cerh ve başıma sopa ile kezâlik darb ve mütelâhimeten şec etmekle mûcib-i şer‘îsini merkūm Yuvan zimmîden taleb ederim deyü eylediği da‘vâsından bâ-tavassut-ı muslihîn merkūm Yuvan zimmî ile yirmi beş guruş bedel-i makbûza sulh olup mârrü’z-zikr cerh ve şecce ve mâ-yuhdesü-minhe müte‘allika âmme-i de‘âvîden merkūm Yuvan zimmînin zimmetini ibrâ ve ıskāt edip vekîl-i merkūm dahi sulh ve ibrâsını bi’l-vekâle kabûl edip bu vechile kat‘-ı münâza‘a eyledikleri ba‘de’l-inhâ bi’l-iltimâs huzûr-ı âlîlerine i‘lâm olundu. Fî 23 min-M sene 1205