Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 293 Hüküm no: 328 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Fatma’nın Seyyid Ali’ye alacak iddiasıyla açtığı davayı ispat edemediği Ma‘rûz Medîne-i Üsküdar’da Kefçe mahallesinde sâkine ve zâtı vech-i şer‘î üzere mu‘arrefe olan Hacce Fatıma bt. el-Hâc Hüseyin nâm hatun medîne-i mezbûrede mahfil-i bâbda meclis-i şer‘-i hatîrde es-Seyyid Ali b. Mustafa mahzarında mezbûr es-Seyyid Ali ile zevcesi gāibetü ani’l-beled Şerife târih-i i‘lâmdan bir buçuk sene mukaddem bir kılıç rehin vaz‘ıyla yedimden bi’l-münâsafa istikrâz ve kabz ve umûrlarına sarfla istihlâk eyledikleri iki yüz elli guruş hakkımın elli guruşun yedlerinden ahz ü istifâ ve iki yüz guruşu zimmetlerinde bâkī kalmağla mezbûr es-Seyyid Ali’nin hisse[sine] isâbet eden yüz guruşu hâlâ taleb ederim deyü da‘vâ ve mezbûr es-Seyyid Ali bi’l-külliye inkâr etmeğin müdde‘iye-i mezbûre ber-vech-i muharrer müdde‘âsını isbâta kādire olamayıp tahlîfe dahi tâlibe olmamağla mûcebiyle müdde‘iye-i mezbûre da‘vâ-yı mezkûresiyle mezbûr es-Seyyid Ali’ye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 22 M sene 1205