Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 293 Hüküm no: 329 Orijinal metin no: [29a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın evine açacağı pencerelerine tahta havale yapmak suretiyle komşularına vereceği zararı önlemeyi taahhüt ettiği Ma‘rûz Sâdır olan fermân-ı âlîlerine imtisâlen kıbel-i şer‘-i şerîfden meb‘ûs Mustafa Efendi dâ‘îleri ve Hâssa mi‘mâr hulefâsından Süleyman b. Mustafa ve es-Seyyid Mehmed b. Musa ile medîne-i Üsküdar’da Hayreddin Çavuş mahallesinde vâki‘ zikri âtî münâza‘un-fîh olan menzile varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde ashâb-ı arzuhâl es-Seyyid Yusuf Ağa b. Mustafa ve Ali Efendi b. Ahmed ve Molla Mustafa b. el-Hâc İbrahim nâm kimesneler ile zâtları mu‘arrefe Ümmügülsüm bt. Ahmed ve Âişe bt. Hasan nâm hatunlar meclis-i ma‘kūd-ı mezkûrda arzuhâlde ismi mezkûr Mehmed Ağa b. Mustafa nâm kimesne mahzarında mezbûr Mehmed Ağa işbu mu‘âyene olunan menzilini müceddeden binâ etmekle bizim menzillerimiz cânibine küşâd edeceği sekiz aded pencerelerinden bizim menzillerimizin makarr-ı nisvân olan mevâzı‘ına havâle zararı olmağla men‘ ü def‘ olunmak matlûbumuzdur deyü herbiri da‘vâ ve mi‘mârân-ı mezbûrân ile sâir ehl-i vukūf nazar eylediklerinde fi’l-hakīka mezbûr Mehmed Ağa’nın küşâd edeceği sekiz aded pencerelerinden müdde‘iyûn-ı mezbûrûnun menzillerine havâle zararı olduğu zâhir ve küşâd olunacak pencerelerin hakk-ı kanadı olmayıp ittisâlinde mezbûr Ali Efendi’nin bostanı olmağla havâle zararını def‘ mezbûr Ali Efendi’nin iznine muhtâc olmağla beynlerine ba‘de vukū‘ı’l-münâza‘a bâ-tavassut-ı muslihîn mezbûr Ali Efendi kendi bostanı tarafından havâle vaz‘ına ba‘de’l-izn mezbûr Mehmed Ağa dahi zikr olunan sekiz aded pencerelerin önüne tahta havâle vaz‘ıyla zarar-ı şer‘îsini def‘e ta‘ahhüd ve müdde‘iyûn-ı mezbûrûn dahi râzîler olup kat‘-ı münâza‘a eyledikleri ba‘de’l-inhâ bi’l-iltimâs huzûr-ı âlîlerine i‘lâm olundu. Fî-selhi Za sene 1204