Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 294 Hüküm no: 330 Orijinal metin no: [29a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’den aldığı borca (vefa) karşılık evini rehin veren Fatma bt. Mehmed’in borcunu ödeyip evi geri almak üzere anlaştıkları Ma‘rûz Medîne-i Üsküdar’da mahallesinde sâkine mu‘arrefetü’z-zât Âişe bt. Mehmed medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe Fatıma bt. Mehmed mahzarında mezbûre Fatıma Hatun bin iki yüz bir senesi Saferi’l-hayr’ın yirminci günü yedimden istidâne ve kabz ve umûruna sarfla istihlâk eylediği cihet-i karzdan altmış guruş deyni mukābelesinde mahalle-i mezbûrede vâki‘ ma‘lûmü’l-hudûd ve’l-müştemilât mutasarrıfe olduğu bir bâb vakıf menzilini bâ-ma‘rifet-i mütevellî bana vefâen ferâğ etmekle meblağ-ı merkūmun on guruşun yedinden ahz ü kabz ve elli guruşu zimmetinde kalmağla menzil-i mezkûru rehniyetden ba‘de’l-fekk meblağ-ı bâkī-i merkūm elli guruşu taleb ederim deyü da‘vâ eyledikde ol dahi ikrâr ü i‘tirâf etmeğin mûcebiyle meblağ-ı bâkī-i merkūm elli guruşu müdde‘iye-i mezbûreye edâ ve teslîme mezbûre Fatıma Hatun’a ve menzil-i mezkûru rehniyetden fekke müdde‘iye-i mezbûre Âişe’den herbirine tenbîh olunup lâkin mezbûre Fatıma Hatun meblağ-ı merkūm elli guruşu hâlen edâya iktidârı olmayıp istimhâl eyledikde müdde‘iye-i mezbûre Âişe Hatun dahi kendiye altmış bir gün tamamında edâ ve teslîm etmek üzere rızâsıyla mezbûre Fatıma Hatun’u imhâl eyledikde mezbûre Fatıma Hatun dahi müddet-i mehl tamamında meblağ-ı mezbûru edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî ( ) min-Z [sene 1204]