Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 295 Hüküm no: 332 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı İbrahim Efendi’nin vârislerinin mirastan olan İstavroz köyündeki tarlaları zapt ettikleri iddiasıyla Hammamizade Hacı Mehmed Ağa’nın vârislerine açtıkları davada haksız bulunarak davanın reddedildiği Ma‘rûz Vârid olan fermân-ı âlîlerine imtisâlen kıbel-i şer‘den meb‘ûs kuzâtdan Harîrîzâde Mehmed Esad Efendi dâ‘îleri medîne-i Üsküdar’a tâbi‘ İstavros karyesinde vâki‘ zikri âtî arsa üzerine varıp mazbûtü’l-esâmî Müslimîn huzûrlarında akd-i meclis-i şer‘-i âlî ettikde mahmiye-i İslâmbol’da Sinanağa mahallesinde sâkin iken bundan akdem vefât eden kuzâtdan el-Hâc İbrahim Efendi b. Mustafa b. Abdülmennan’ın verâseti zevce-i metrûkesi Nefise bt. Abdullah nâm hatun ile sulbî sagīr oğlu Mehmed Emin’e inhisârından sonra sagīr-i mezbûrun mansûbe vasîsi mu‘arrefetü’z-zât anası mezbûre Nefise Hatun meclis-i ma‘kūd-ı mezkûrda kendi nefsinden asıl ve zevcesi Hadice ile mezbûre Hadice’nin hemşîresi Akıle bintey Hammâmîzâde el-Hâc Mehmed Ağa ve kayın vâlidesi Rukiye bt. Hüseyin nâm hatunlar taraflarından ber-vech-i âtî vekîlleri olduğu zât-ı mezbûrânı ârifân Ömer Efendi b. Hüseyin ve İbrahim Ağa b. Ömer nâm kimesneler şehâdetleriyle sâbit olan sâhib-i arzuhâl Mühürdâr Ahmed Efendi b. Mustafa mahzarında işbu derûnunda akd-i meclis-i şer‘ olunan etrâf-ı erba‘ası el-Hâc Ömer bağçesi ve İbrahim Efendi veresesi tarlası ve ba‘zan Bölükbaşı Mustafa ve ba‘zan Molla Mehmed ve Bostanî Ahmed menzilleri ve tarîk-ı âm ile mahdûd merkūm Abdullah Ağa Vakfı’na senevî kırk beş akçe mukāta‘alı eşcâr-ı müsmire ve ba‘zan taş duvarı hâvî tahmînen dört buçuk dönüm mikdârı arsa zevcim müteveffâ-yı mezbûr el-Hâc İbrahim Efendi’nin bin yüz altmış senesi târihiyle müverraha işbu yedimde olan bir kıt‘a mübâya‘a hücceti mantûkunca yedinde mülkü olup ba‘de vefâtihî bize mevrûs olmuş iken vekîl-i mezbûr Ahmed ile müvekkilât-ı mezbûrât fuzûlî müdâhale ederler suâl olunup müdâhaleleri men‘ ü def‘ olunmak matlûbumdur deyü da‘vâ ve mezbûr Ahmed Efendi cevâbında fi’l-hakīka arsa-i mezkûre bin yüz altmış senesinde mezbûr el-Hâc İbrahim Efendi’nin ve sâir müşterekleri olan Mustafa ve Râziye ve Zeliha nâm hatunlar ile Veli Beşe veresesi tasarruflarında iken mezbûrûndan herbiri hisselerini Hammâmîzâde mezbûr el-Hâc Mehmed Ağa’ya bâ-hüccet-i şer‘iye bey‘ etmeleriyle mezbûr el-Hâc Mehmed Ağa’nın hayatında yedinde mülkü ve ba‘de vefâtihî zevcesi mezbûre Rukiye ile zevce-i uhrâsından mütevellidler sulbî evlâdları Hüseyin ve Mehmed Said ve Mehmed Tâhir ve sulbiye kızları mezbûretân Hadice ve Âkıle’ye mevrûs olup kable’l-kısme mezbûr Hüseyin vefât edip verâseti karındaşları mezbûrûn Mehmed Said ve Mehmed Tâhir ve Hadice ve Akıle’ye kable’l-kısme mezbûr Mehmed Tâhir vefât edip verâseti karındaşları mezbûrûn Mehmed Said ve Hadice ve Âkıle’ye kable’l-kısme mezbûr Mehmed Said vefât edip verâseti zevcesi diğer Nefise bt. Abdullah ile sulbî evlâdları Mehmed Esad ve Fatıma’ya münhasıra ve mesele-i mîrâsları bi-hükmi’l-münâsaha üç yüz seksen dört sehmden kırk sekiz sehmi bir mertebede mezbûre Rukiye’ye ve seksen dörder sehmden yüz altmış sekiz sehmi üç mertebede mezbûretân Hadice ve Akıle’ye ve yirmi bir sehmi mezbûre diğer Nefise’ye ve doksan sekiz sehmi mezbûr Mehmed Esad’a ve kırk dokuz sehmi mezbûre Fatıma’dan herbirine isâbeti tahakkukundan sonra mezbûrûn diğer Nefise ve Mehmed Esad ve Fatıma arsa-i mezkûrede olan yüz altmış sekiz sehm hisselerini bâ-hüccet bana bey‘ ben dahi iştirâ etmemle arsa-i mezkûre benim ile mezbûrât Rukiye ve Hadice ve Âkıle’nin irsen ve şirâen tasarrufumuzda olup hattâ müteveffâ-yı mezbûr el-Hâc İbrahim Efendi’nin ile’l-vefât yirmi üç sene ve ba‘de vefâtihî veresesi muvâcehesinde on iki sene bilâ-nizâ‘ zabt ü tasarruf olunagelmişdir deyü takrîrine mutâbık ve bin yüz yetmiş bir ve yetmiş iki ve yetmiş üç seneleri târihiyle müverraha hücec-i şer‘iye ibrâzıyla ba‘de’d-def‘ ve’l-inkâr vekîl-i mezbûr Ahmed Efendi ber-vech-i muharrer eylediği def‘ini udûlden es-Seyyid İbrahim Efendi b. Mehmed ve Ömer Efendi b. Hüseyin şehâdetleriyle mezbûre Nefise muvâcehesinde vech-i şer‘î üzere isbât etmeğin mûcebiyle müdde‘iye-i mezbûre Nefise Hatun bî-vech-i şer‘î mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 19 min-Muharrem sene 1205