Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 297 Hüküm no: 333 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İbrahim’e küfredip hakaret eden Fatma Hatun’un tazirle cezalandırılması Ma‘rûz Medîne-i Üsküdar’da Hasanağa mahallesi sükkânından sâhib-i arzuhâl es-Seyyid İbrahim b. es-Seyyid Mehmed medîne-i mezbûrede mahfil-i bâbda meclis-i şer‘-i hatîrde arzuhâlde mezkûr mu‘arrefetü’z-zât Fatıma bt. İsmail nâm hatun mahzarında mezbûre Fatıma Hatun târih-i i‘lâmdan iki gün mukaddem bi’l-muvâcehe Yezid ve Moskov ve kâfir deyü bana şetm ve ırzımı hetk etmekle mûcib-i şer‘îsini taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr es-Seyyid İbrahim ber-vech-i muharrer müdde‘âsını udûlden Hafız es-Seyyid Mustafa Efendi b. İsmail ve Ahmed Ağa b. Mehmed nâm kimesneler şehâdetleriyle muvâcehesinde vech-i şer‘î üzere isbât etmeğin mûcebiyle mezbûre Fatıma Hatun’a şer‘an ta‘zîr lâzım geldiği mübâşiri çavuş kulları iltimâsıyla huzûr-ı âlîlerine i‘lâm olundu. Fî 2 min-S sene 1205