Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 297 Hüküm no: 335 Orijinal metin no: [29b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Mehmed’e borcunu ödemesi için Süleyman b. Mustafa’ya tenbih Ma‘rûz Medîne-i Üsküdar’da Tenbel el-Hâc Mehmed mahallesinde sâkine mu‘arrefetü’z-zât Fatıma bt. Mehmed nâm hatun medîne-i mezbûrede mahfil-i bâbda meclis-i şer‘-i hatîrde Süleyman b. Mustafa nâm kimesne mahzarında mezbûr Süleyman târih-i i‘lâmdan sekiz sene mukaddem bâ-temessük yedimden istidâne ve kabz eylediği cihet-i karz-ı şer‘îden otuz dört guruş hakkımın on yedi guruşunu yedinden ahz on yedi guruşu zimmetinde hakkım bâkī kalmağla taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr [müdde‘iye-i mezbûre] ber-vech-i muharrer müdde‘âsını udûlden Mustafa b. İbrahim ve Ahmed b. Ali nâm kimesneler şehâdetleriyle muvâcehesinde isbât etmeğin mûcebince meblağ-ı bâkī-i merkūm on yedi guruşu müdde‘î-i [müdde‘iye-i] mezbûreye edâ ve teslîme mezbûr Süleyman’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 3 min-S sene 1205