Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 298 Hüküm no: 336 Orijinal metin no: [29b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Mustafa’nın Halil b. Osman’a emanet verdiği bıçağının bedelinin ödenmesi Ma‘rûz Osman b. Mustafa nâm kimesne medîne-i Üsküdar’da mahfil-i bâbda meclis-i şer‘-i hatîrde Halil b. Osman nâm kimesne mahzarında târih-i i‘lâmdan bir ay mukaddem mezbûr Halil yedine bi-tarîki’l-emâne teslîm eylediğim yirmi üç guruş kıymetli bir aded bıçağım mevcûd ise aynını müstehlek ise kıymet-i mezkûresini taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını ve hîn-i teslîmde kıymeti ol-mikdâr olduğunu lede’t-tezkiye adâletleri zâhir olan İbrahim b. İsmail ve Ahmed b. İbrahim nâm kimesne şehâdetleriyle vech-i şer‘î üzere muvâcehesinde isbât etmeğin mûcebiyle meblağ-ı merkūm yirmi üç guruşu müdde‘î-i mezbûra edâ ve teslîme mezbûr Halil’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî-gurrei Safer sene 1205