Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 301 Hüküm no: 341 Orijinal metin no: [30a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maroke v. Avadik’in, bağının bir bölümünü zapt ettiği iddiasıyla Hacı Ahmed Ağa b. Mustafa’ya açtığı davadan vazgeçtiği Ma‘rûz Sâdır olan fermân-ı âlîlerine imtisâlen kıbel-i şer‘-i şerîfden meb‘ûs Mustafa Efendi dâ‘îleri ve Hâssa mi‘mârı hulefâsından Mehmed Ârif ve es-Seyyid Osman ile medîne-i Üsküdar hâricinde Akyapı nâm mahâlde vâki‘ zikri âtî münâza‘un-fîh olan bağ arsasına varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde arzuhâl eden Maroke v. Avadik nâm zimmî meclis-i ma‘kūd-ı mezkûrda arzuhâlde ismi mezkûr el-Hâc Ahmed Ağa b. Mustafa mahzarında işbu derûnunda akd-i meclis-i şer‘ olunan etrâf-ı erba‘ası Mehmed Efendi bağı ve Gürcü Yusuf bağı ve Paşa tarlası ve tarafeyni tarîk-ı âm ile mahdûd bir kıt‘a kürûmu mülk bağ hâzır bi’l-meclis Abdullah Ağa b. Halil’in mukaddemâ yedinde mülkü iken târih-i i‘lâmdan yirmi iki ay mukaddem mezbûr Mehmed bağı ve tarîk-ı âm taraflarından bağ-ı mezkûr derûnunda atik hendeğe varınca sekiz dönüm mahâllini ifrâz ve mezbûr el-Hâc Ahmed Ağa’ya semen-i ma‘lûma ve bâ-hüccet-i şer‘iye bey‘ edip ve bağ-ı mezkûrun mâ‘adâ mahâllini dahi üç ay mukaddem semen-i ma‘lûma ve bâ-hüccet-i şer‘iye bana bey‘ ve temlik edip lâkin mezbûr el-Hâc Ahmed Ağa zikr olunan atik hendek ittisâlinde benim iştirâ eylediği bağ-ı mezkûr arsasından mi‘mârân-ı mezbûrânın terbî‘i ile iki bin dört yüz otuz altı zirâ‘ mahâllini gasb ve müceddeden hendek hafr ve bi-gayrı hakkın vaz‘-ı yed etmekle kasr-ı yedine tenbîh olunmak matlûbumdur deyü da‘vâ ve mezbûr el-Hâc Ahmed Ağa cevâbında bağ-ı mezkûru hîn-i iştirâda alâmât-ı fâsıla ta‘yîn olunmayıp ancak sekiz dönüm mahâllini iştirâ ve zikr olunan iki bin dört yüz otuz altı zirâ‘ mahâlli benim mülk-i müşterâm olan sekiz dönüm mahal dâhilinde olmağla bi-hakkın vaz‘-ı yed ederim deyü def‘-i şer‘î birle beynlerinde ba‘de vukū‘ı’l-münâza‘a bâ-tavassut-ı muslihîn müdde‘î-i merkūm Maroke zimmî eylediği da‘vâsından fâriğ ve müdde‘âsı olan bağ arsasına ve bi’l-cümle husûs-ı mezkûra müte‘allika âmme-i de‘âvîden mezbûr el-Hâc Ahmed Ağa’nın zimmetini ibrâ ve ıskāt edip ol dahi ibrâsını kabûl ve fîmâ-ba‘d müceddeden hafr olunan hendek beynlerinde alâmât-ı fâsıla olup herbiri âharın hisse-i müfre[ze]sine müdâhale etmemek üzere mu‘âhede birle kat‘-ı münâza‘a eyledikleri ba‘de’l-inhâ mübâşiri çavuş kulları iltimâsıyla huzûr-ı âlîlerine i‘lâm olundu. Fî 29 min-M sene 1205