Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 402 Hüküm no: 413 Orijinal metin no: [94b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuruyemiş emini olan Ömer Ağa ve ortağı Yusuf ile önceki emin Ali Ağa arasında davada sulh oldukları Sâbıkā bâ-berât-ı âlîşân hazîne-mânde eylediği elli dört akçe ulûfesi mukābelesinde meyve-i huşk emîni olup Mahmiye-i İstanbul’da Hocapaşa Mahallesi’nde sâkin Ali Ağa b. Ahmed nâm kimesne meclis-i şer‘-i şerîf-i enverde bâ‘isiyye’l-kitâb Ömer Ağa b. el-Hâcı <<İbrahim’in>> İbrahim ve şerîki Yusuf b. Abdullah mahzarlarında ikrâr ve takrîr-i kelâm edip emânet-i [95a] mezkûre ber-vech-i muharrer bundan akdem tasarrufumda iken mez[bû]rân sâhib-i evvel olmak üzere benden da‘vâ ve ahz u kabz ve üzerlerine berât ettirmeleriyle hazîne-mânde eylediğim mârru’z-zikr ulûfemi mezbûrân Ömer Ağa ve Yusuf’dan taleb ve da‘vâ sadedinde iken muslihûn tavassutuyla mezbûrân bana iki yüz otuz guruş def‘ ve teslîm ben dahi yedlerinden ahz u kabz ve istihlâk eylediğimden sonra atîk berâtımı kendilere ba‘de’t-teslîm zikrolunan emânet ulûfeye müte‘allika âmme-i da‘vâdan ben mezbûrân Ömer Ağa ve Yusuf’u ibrâ-i âm ile ibrâ ve iskāt eylediğimde onlar dahi ber-vech-i iştirâk bana medfû‘ları olan meblağ-ı mezbûr iki yüz otuz guruşa müte‘allika âmme-i da‘vâdan her biri benim zimmetimi ibrâ ve iskāt eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Ömer Ağa b. Mehmed Ağa, İbrahim Ağa b. Abdullah, Süleyman Ağa b. Mustafa, el-Hâc Mustafa b. Hasan, Hasan Çelebi b. Ali, el-Hâc Salih Efendi kâtib-i muhâsebe, Ateşî el-Hâc Mehmed Efendi, Mehmed Efendi kâtib-i mîzan-ı harîr, el-Hâc İbrahim Ağa emîn.