Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 402 Hüküm no: 414 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa ile Mustafa Ağa’nın Makrihorya (Bakırköy) köyünde ortak işletmek üzere bir hamam inşa ettikleri İkrâr ve ta‘ahhüd. Hilâl-i sutûrda mezkûr husûsu mahallinde ketb ü tahrîr için bi’l-iltimâs savb-ı şer‘-i kavîmden irsâl olunan Mevlânâ Mustafa Efendi b. el-merhûm Yunus Efendi Mahmiye-i İstanbul’da Firuzağa Mahallesi’nde sâkin fahrü’l-emsâl Hasan Ağa b. Abdullah’ın menziline varıp zeyl-i sahîfede muharrerü’l-esâmî Müslimîn mahzarlarında akd-i meclis-i şer‘-i şerîf ettikde mezbûr Hasan Ağa meclis-i ma‘kūd-ı mezkûrda şerîki bâ‘isü hâze’l-kitâb Mustafa Ağa b. Derviş Ali b. Mehmed nâm kimesne tarafından husûs-ı âti’z-zikre vekîl olduğu Dergâh-ı âlî yeniçerileri çavuşlarından umdetü’l-eşbâh Osman Ağa b. Hüseyin ve Mehmed Çelebi b. Şa‘ban şehâdetleriyle sâbit ve sübût-ı vekâletine hükm-i şer‘î lâhık olan Ali Ağa b. Ali mahzarında ikrâr ve takrîr-i kelâm edip Havâss-ı Refî‘a kazâsına tâbi‘ Makohora [Makrihorya] nâm karyede kâin etrâf-ı erba‘adan câmi‘-i şerîf ve imâm ve müezzin meşrûtaları vakıf menziller ve Arabacı el-Hâc Mehmed menzili ve tarîk-i âm ile mahdûd ma‘lûmü’l-müştemilât menzil ale’l-iştirâki’s-seviyy yedimizde şirâen mülk ve hakkımız iken menzil-i mezkûru müvekkil-i mezbûr ile hedm ve mâlımız ile yine iştirâken yedi kurna ve iki halvet ve kenîf ve câmekân ve bir bi’r-i mâ’yı muhtevî hamam binâ ve ihdâs eylediğimize binâen hamam-ı mezkûru yine müvekkil-i mezbûr ile ale’l-iştirâki’s-seviyy tasarruf etmek üzere ta‘ahhüd ve ittifâk eyledik dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an irsâl olunan Çukadâr el-Hâc Mehmed b. Hüseyin ve Ali b. Yusuf nâm kimesneler meclis-i şer‘a gelip takrîri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-selhi Şa‘bâni’l-mu‘azzam sene 1143. Şuhûdü’l-hâl: Osman Çavuş Ağa b. Hüseyin, Hüseyin Ağa b. Ahmed, Mustafa Ağa b. Receb, Abdullah Ağa b. İbrahim, İbrahim Ağa b. Mehmed, Mehmed Ağa b. Şa‘ban, Osman b. Mehmed ve gayruhum.