Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 305 Hüküm no: 349 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rali v. Yorgi ile oğlu Zelyo’nun, kalan alacaklarının ödenmesi talebiyle açtıkları davayı ispat edemedikleri Ma‘rûz Medîne-i Üsküdar’a tâbi‘ Kuzguncuk karyesinde mütemekkin Rali v. Yorgi ile oğlu Zelyo nâm zimmîler medîne-i mezbûrede mahfil-i bâbda meclis-i şer‘-i hatîrde Dimitri v. Varsam nâm zimmî muvâcehesinde târih-i i‘lâmdan sekiz ay mukaddem merkūm Dimitri zimmetinde beynimizde ma‘lûm duvarcılık ücretinden on üç buçuk guruş hakkımızın yedi guruşunu yedinden ahz ü istifâ ve altı buçuk guruşu zimmetinde bâkī kalmağla hâlâ taleb ederim deyü da‘vâ ve merkūm Dimitri cevâbında müdde‘iyân-ı merkūmâna ol-mikdâr deyni olduğunu ikrâr lâkin kabzını müte‘arrif oldukları yedi guruşdan mâ‘adâ altı buçuk guruşu dahi kendilere edâ ve teslîm etmiş idim deyü ba‘de’d-def‘ ve’l-inkâr merkūm Dimitri zimmî def‘ini isbâta kādir olamayıp talebiyle merkūmân Rali ve Zelyo zimmîden herbirine yemîn teklif olundukda yemînden nükûl etmeleriyle mûcebiyle müdde‘iyân-ı merkūmân Rali ve Zelyo zimmîler da‘vâ-yı mezkûreleriyle merkūm Dimitri zimmîye bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 17 M sene 1205