Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 305 Hüküm no: 350 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Efendi’den aldıkları borca karşılık evlerini rehin veren (vefa) Mehmed b. Mehmed ile hanımının borçlarını ödeyip evi rehniyetten kurtarmaları Ma‘rûz Medîne-i Üsküdar’da Selami mahallesi sükkânından Süleyman Efendi b. el-Hâc Hasan medîne-i mezbûrede mahfil-i bâbda meclis-i şer‘-i hatîrde Mehmed b. Mehmed ile zevcesi mu‘arrefetü’z-zât Ümmügülsüm bt. Ali nâm hatun mahzarlarında merhûm Selami Ali Efendi vakfı musakkafâtından olup mahalle-i mezbûrede vâki‘ lede’l-ahâli ve’l-cîrân ma‘lûmü’l-hudûd bi’l-icâreteyn mutasarrıf oldukları vakıf menzillerini bin iki yüz senesi Cumâdelâhire’nin on üçüncü günü yedimden ve mâlımdan istidâne ve kabz eyledikleri cihet-i karzdan iki yüz guruş deynleri mukābelesinde bâ-ma‘rifet-i mütevellî vefâen ferâğ etmeleriyle menzil-i mezkûru fek ile meblağ-ı merkūm iki yüz guruşu hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını udûlden Osman b. Mehmed ve Molla Ahmed b. İsmail nâm kimesneler şehâdetleriyle vech-i şer‘î üzere muvâcehelerinde isbât etmeğin mûcebiyle meblağ-ı merkūm iki yüz guruşu müdde‘î-i mezbûr Süleyman Efendi’ye edâ ve teslîm ile menzil-i mezkûru fekke zevcân-ı mezbûrân Mehmed ve Ümmügülsüm’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 10 min-S sene 1205