Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 307 Hüküm no: 354 Orijinal metin no: [31a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Hüseyin’e biriken nafaka bedelini oğlu Osman’ın ödemesi Ma‘rûz Medîne-i Üsküdar’da Vâlide-i Atik mahallesinde sâkine ve zâtı vech-i şer‘î üzere mu‘arrefe olan Emetullah bt. Hüseyin nâm hatun medîne-i mezbûrede mahfil-i bâbda meclis-i şer‘-i hatîrde oğlu Osman b. Ali mahzarında bundan akdem bâ-hüccet-i şer‘iye külle yevm oğlum mezbûr üzerine takdîr olunan üç para nafaka-i müstedâne-i mefrûzamdan işbu Saferi’l-hayr’ın sekizinci gününe gelince zimmetinde on iki [ayda] müctemi‘a olan yirmi yedi guruş nafaka-i müstedânemi hâlâ taleb ederim deyü da‘vâ mezbûr Osman cevâbında ber-vech-i meşrûh ikrâr lâkin meblağ-ı mezbûr yirmi yedi guruşun yirmi iki buçuk guruşunu müdde‘iye-i mezbûreye edâ ve teslîm edip zimmetimde ancak dört buçuk guruş deynim bâkī kalmış idi deyü ba‘de’d-def‘ ve’l-inkâr mezbûr Osman def‘-i mezkûrunu isbâtdan ızhâr-ı acz edip talebiyle vâlidesi müdde‘iye-i mezbûre gıbbe’t-tahlîfi’ş-şer‘î mûcebiyle meblağ-ı merkūm yirmi yedi guruşu vâlidesi müdde‘iye-i mezbûreye edâ ve teslîme mezbûr Osman’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 13 min-Safer sene 1205