Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 403 Hüküm no: 415 Orijinal metin no: [95a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mehmed Efendi’nin eşi Şerife Fâtıma ile kızı Fâtıma’nın aralarındaki alacak davasında sulh oldukları Medîne-i Üsküdar ahâlîsinden olup bundan akdem Drama kazâsına mutasarrıf iken vefât eden Mehmed Efendi b. Mustafa b. Abdullah’ın verâseti zevce-i menkûha-i metrûkesi Şerife Fâtıma bt. es-Seyyid Hüseyin ile sulbî sagīr oğlu es-Seyyid Mehmed’e ve sulbiye kebîre kızı Fâtıma ve sagīre kızı Şerife Rukiye’ye münhasıra oldukdan sonra mes’ele-i mîrâsları otuz iki sehmden olup sihâm-ı mezbûreden dört sehmi zevcesi mezbûreye ve on dört sehmi sagīr-i mezbûr Mehmed’e ve yedişer sehm kızları mezbûretândan her birine isâbet eylediği şer‘an zâhir ve mütehakkık oldukdan sonra zevce-i mezbûre Şerife Fâtıma Hatun meclis-i şer‘-i şerîf-i enverde kebîre kızı bâ‘isetü hâzihi’l-vesîka mezbûre Fâtıma Hatun tarafından sulh-ı âti’z-zikre vekîl olduğu zât-ı merkūmeyi ârifân Molla Ali b. Abdurrahman ve Osman b. Mehmed şehâdetleriyle sâbit olan zevci Mehmed Çelebi b. Ahmed nâm kimesne mahzarında ikrâr ve takrîr-i kelâm edip işbu yedimde olan bir kıt‘a i‘lâm nâtık olduğu üzere gāib ani’l-meclis Abdullah nâm kimesne müteveffâ-i mezbûr Mehmed Efendi zimmetinde cihet-i deyn-i şer‘îden iki yüz guruş hakkım vardır deyü üzerime mübâşir ta‘yîn ve huzûr-ı hükkâm-ı şer‘a ihzâr ettirip meblağ-ı mezkûru tereke-i müteveffâ-i mezbûrdan taleb ve da‘vâ ve ben dahi mezbûrun [95b] da‘vâ-yı mezkûrunu def‘ esnâsında mübâşir ve i‘lâmiye ve sâir verilmesi lâzım olanlara emriyle altmış dört guruş mikdârı masrûfum olmağla tashîh-i merkūme üzere kızım merkūme Fâtıma’nın sehmine isâbet eden on dört guruşu taleb ve da‘vâ eylediğimde beynimizde münâza‘ât-ı kesîre vâki‘ olmuş idi el-hâletü hâzihî da‘vâ-yı mezkûremden beni vekîl-i mezbûr ile beş buçuk guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı merkūmu vekîl-i mezbûr Mehmed Çelebi yedinden tamamen ahz u kabz eylediğimden sonra husûs-ı mezkûra müte‘allika müvekkile-i mezbûre Fâtıma Hatun’un zimmetini ibrâ-i âmm-ı kātı‘u’n-nizâ‘la ibrâ ve iskāt eylediğimde vekîl-i merkūm dahi kezâlik bana medfû‘u olan bedel-i sulh-ı mezkûra müte‘allika da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah bölükbaşı, İbrahim Çelebi b. Mustafa du‘âcı, Ya‘kub b. Abdullah muhzır, Urfalı Mustafa muhzır.