Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 308 Hüküm no: 356 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Mıgırdıç’ın Osman Efendi Vakfı’ndan istiğlal yoluyla aldığı borcu ödemesi Ma‘rûz Medîne-i Üsküdar’da Atpazarı kurbünde vâki‘ merhûm Osman Efendi vakfının hâlâ mütevellîsi es-Seyyid Yakub Efendi b. es-Seyyid el-Hâc Mahmud tarafından vekîl-i müseccel-i şer‘îsi ve vakfın câbîsi Ali Efendi b. Salih medîne-i mezbûrede mahfil-i bâbda meclis-i şer‘-i hatîrde Kirkor v. Mıgırdıç muvâcehesinde merkūm Kirkor zimmî bundan akdem mâl-ı vakf-ı mezbûrdan olmak üzere müvekkilim mütevellî-i mezbûr yedinden istikrâz ve kabz eylediği beş yüz guruş deyni mukābelesinde emlâkinden medîne-i mezbûrede Selami mahallesinde kâin ma‘lûmü’l-hudûd ve’l-müştemilât bir bâb mülk menzilini deyn-i mezkûr mukābelesinde müvekkilim mütevellî-i mezbûra bi-tarîki’l-istiğlâl bey‘ ve teslîm ve ba‘de’t-tahliye ve’t-takābuz ikişer yüz ellişer para ücret ile istîcâr ve kabûl edip târih-i i‘lâma gelince icâre-i mezkûreden müctemi‘a olan ancak on dokuz aylık yüz on sekiz guruş otuz parayı vakf-ı mezbûr için bi’l-vekâle taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm yüz on sekiz guruş otuz paranın vakf-ı mezbûr için müvekkil-i mezbûra edâsıyla merkūm Kirkor zimmî ilzâm olunduğu bi’l-iltimâs huzûr-ı âlîlerine i‘lâm olundu. Fî 12 min-Muharremi’l-harâm sene 1205