Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 308 Hüküm no: 357 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdurrahman’ın nafaka bedeli için açtığı davada sulh olduğu Ma‘rûz Medîne-i Üsküdar’da Selami mahallesinde sâkine mu‘arrefetü’z-zât Hadice bt. Abdurrahman nâm hatun medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe Fatıma bt. el-Hâc Mehmed Emin nâm hatun mahzarında mezbûre Fatıma Hatun târih-i i‘lâmdan on ay mukaddem bi-şarti’r-rücû‘ emriyle külle yevm nafakasına onar para harc ü sarf etmemle şühûr-ı mezkûrede zimmetinde müctemi‘a olan yetmiş beş guruş masrûfâtımı ve şühûr-ı mezkûrede sebkat eden hizmetimin ecr-i mislini taleb ederim deyü eylediği da‘vâsından bâ-tavassut-ı muslihîn yirmi beş guruş bedel mukābelesinde mezbûre Fatıma Hatun ile sulh olup ziyâde müdde‘âsı olan elli guruşa ve ecr-i misline müte‘allika âmme-i de‘âvîden mezbûre Fatıma Hatun’un zimmetini ibrâ ve ıskāt eyledikde ol dahi ibrâsını kabûl edip lâkin bedel-i sulh-ı merkūm yirmi beş guruşu mezbûre Fatıma Hatun istimhâl eyledikde müdde‘iye-i mezbûre dahi rızâsıyla târih-i i‘lâmdan on beş gün tamamında bedel-i sulh-ı mezkûru kendiye edâ etmek üzere imhâl eyledikde ol dahi müddet-i ma‘lûme tamamında edâya ta‘ahhüd edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî-selhi M sene 1205