Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 309 Hüküm no: 358 Orijinal metin no: [31b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Hacı Ahmed’in Kasap Yani’de olan alacağını Yani’ye borcu olan Yuda’nın ödemesi Ma‘rûz Mahmiye-i İslâmbol’da Meydancık kurbünde sâkin Bostanî el-Hâc Ahmed b. el-Hâc Mehmed nâm kimesne medîne-i Üsküdar’da mahfil-i bâbda meclis-i şer‘-i hatîrde Yuda v. Salamon nâm Yahûdî muvâcehesinde gāib ani’l-meclis Kasab Yani nâm zimmî zimmetinde cihet-i karzdan altmış guruş hakkım olup gāib-i merkūm Yani zimmînin dahi işbu merkūm Yuda Yahûdî zimmetinde cihet-i deyn-i şer‘îden altmış guruş hakkı olup bundan akdem ben ve merkūm Yuda ve gāib-i merkūm Yani üçümüz bir mahâlde hâzır olduğumuz hâlde gāib-i mezbûr Yani zimmî meblağ-ı mezbûr altmış guruş ile beni medyûnu işbu merkūm Yuda Yahûdî üzerine havâle-i sahîha-i şer‘iye ve herbirimiz ber-vech-i muharrer havâle-i mezkûreyi kabûl etmişidik meblağ-ı mezbûr altmış guruşun on guruşunu merkūm Yuda Yahûdî medyûna ahz ü kabz ve elli guruşu zimmetinde bâkī kalmağla hâlâ taleb ederim deyü da‘vâ ve merkūm Yuda Yahûdî cevâbında ber-vech-i muharrer ikrâr ü i‘tirâf etmeğin mûcebiyle meblağ-ı mezbûr elli guruşun müdde‘î-i mezbûra edâsıyla merkūm Yuda Yahûdî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 11 min-Safer sene 1205