Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 404 Hüküm no: 416 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası el-Hâc Mehmed’den boşanan Zeyneb Hatunun yanındaki çocuğu Fâtıma’ya nafaka bağlanması Mahmiye-i İstanbul’da Hoca Hayreddin Mahallesi sâkinelerinden olup zâtı ta‘rîf-i şer‘î ile mu‘arrefe olan işbu bâ‘isetü’l-vesîka Zeyneb Hatun bt. Halil meclis-i şer‘-i şerîf-i enverde zevc-i sâbıkı el-Hâc Mehmed b. Ahmed nâm kimesne mahzarında takrîr-i kelâm ve tâ‘bir ani’l-merâm edip mezbûr el-Hâc Mehmed’in firâşından hâsıla ve benden mütevellide bi-hakkı’l-hıdâne hacr ve terbiyemde olan işbu sagīre sadriye kızım Fâtıma’nın nafaka ve kisve-bahâsı’çün babası mezbûr el-Hâc Mehmed üzerine kıbel-i şer‘den kadr-i ma‘rûf meblağ farz ve takdîr olunması matlûbumdur dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb- hazretleri dahi sagīre-i mezbûre Fâtıma’nın ber-vech-i muharrer nafaka ve kisve-bahâsı’çün târih-i kitâbdan babası mezbûr el-Hâc Mehmed üzerine bi’t-terâzî beher yevm dokuzar akçe farz ve takdîr edip meblağ-ı mefrûz-ı mezbûru sagīre-i mezbûrenin nafaka ve kisvesi’çün harc ve sarfa ve lede’l-iktizâ istidâneye ve inde’z-zafer babası mezbûr el-Hâc Mehmed üzerine rücû‘a mezbûre Zeyneb Hatun’a izin verilmeğin mâ-hüve’l-vâki‘ bi’t-taleb ketb olundu. Fî-gurreti şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah bölükbaşı, Kādızâde İbrahim Çelebi du‘âcı, Urfalı Mustafa Çelebi muhzır, Kerpicî Abdullah Çelebi.