Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 313 Hüküm no: 366 Orijinal metin no: [32a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Beşe’nin sahibi olduğu kayığın reisindeki kayık ücreti hissesiyle batırdığı sandal bedelinin tazmini Ma‘rûz Medîne-i Üsküdar’da Hamzafakih mahallesinde sâkin Mehmed Emin Beşe b. Veli medîne-i mezbûrede mahfil-i bâbda meclis-i şer‘-i hatîrde İbrahim Reis b. Mustafa mahzarında mezbûr İbrahim Reis çekdirme ta‘bîr olunur kayığımda reis olup târih-i i‘lâmdan iki ay mukaddem beynimizde ma‘lûm kayık ücreti olmak üzere hisseme isâbet eden elli beş buçuk guruş zimmetinde kalmağla meblağ-ı merkūm elli beş buçuk guruş ile mezbûr İbrahim Reis benim iznimsiz Lapseki İskelesi’ne gidip gelirken kayık-ı mezbûrun otuz guruş kıymetli sagīr sandalını helâk etmekle kıymeti olan otuz guruş ki cem‘an seksen beş buçuk guruş hakkımın on beş guruşunu mutâlebesinden mezbûr İbrahim Reis’in zimmetini ibrâ ve ıskāt eylediğimde ol dahi ibrâmı ba‘de’l-kabûl bâkīsi olan yetmiş buçuk guruşu mezbûr İbrahim Reis’den hâlâ taleb ederim deyü da‘vâ ol dahi cevâbında ber-vech-i muharrer ikrâr ü i‘tirâf etmeğin mûcebince meblağ-ı bâkī-i merkūm yetmiş buçuk guruşun müdde‘î-i mezbûra edâsıyla mezbûr İbrahim şer‘an ilzâm olundu. Fî 21 min-Safer sene 1205