.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 252
Hüküm no: 352
Orijinal metin no: [52a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ayşe bt. Abdullah’ın boşandığı kocasında alacağı kalmadığı

Galata kazası muzâfâtından kasaba-i Tophane’de Çerkes el-Hâc Hasan Mahallesi’nde sâkine Âişe bt. Abdullah nâm hatun mahfil-i kazâda zevc-i mutallıkı olup vilâyet-i Rumeli’nde Uruscuk nâm kasabada sâkin olan el-Hâc Mustafa b. el-Hâc Üveys tarafından ikrâr-ı âti’l-beyânı tasdîka vekîl olup vekâleti hasm-ı münkir mahzarında Mehmed Bey b. Veli ve Süleyman b. Abdullah şehâdetleri ile şer‘an sâbite olan işbu bâ‘isü’l-kitâb Receb Bey b. Abdullah Yesârî muvâcehesinde ikrâr-ı tâm ve takrîr-i kelâm edip zevcim müvekkil-i mezbûr el-Hâc Mustafa’yı tatlîk eyledikde ma‘kūdün-aleyh olan bin beş yüz akçe mehr-i müeccelim ve nafaka-i iddetim için farz ve takdîr olunup istidâne eylediğim beş yüz akçe hakkım zimmetinde kalmışdı, hâlâ zikrolunan iki bin akçeyi müvekkil-i mezbûr el-Hâc Mustafa bana irsâl etmekle meblağ-ı mezbûr bi’t-tamam makbûzum olup zikrolunan iki bin akçe hakkımdan bir akçe ve bir habbe bâkī kalmadı meblağ-ı mezbûra ve hukūk-ı zevciyete müte‘allik da‘vâdan müvekkil-i mezbûr el-Hâc Mustafa’nın zimmetini ibrâ-i âmm-ı kātı‘u’n-nizâ‘ ile ibrâ ve ıskāt ederim, min-ba‘d da‘vâ ve nizâ‘ım kalmadı, eğer bir tarîk ile da‘vâ dahi edersem lede’l-hükkâm istimâ‘ olunmaya dedikde mukırra-i mezbûre [Âişe]’nin ber-vech-i meşrûh cârî ve sâdır olan ikrâr ve takrîri vekîl-i mezbûr Receb Bey vicâhen tasdîk ve şifâhen tahkīk etmeğin mâ-vaka‘a gıbbe’t-taleb ketb ü sebt olundu.

Fi’l-yevmi’s-sâdis aşer min-Cemâziyelâhire li-sene erba‘a ve sittin ve elf.

Şuhûdü’l-hâl: el-Hâc Musa b. Abdi, Mahmud b. Ahmed, Muslı Çelebi b. Mehmed, el-Hâc Osman b. el-yesârî, Mehmed Bey attâr, el-Hâc Ali b. Abdullah, Ramazan Beşe b. Abdullah ve gayruhum.