Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 404 Hüküm no: 417 Orijinal metin no: [95b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Ağa veresesi ile Hasan Ağa b. Abdullah’ın ev satışından dolayı aralarındaki davada sulh oldukları Mahmiye-i İstanbul’da Kirmasti Mahallesi sâkinelerinden olu[p] zâtları Mehmed Efendi b. Abdülfettâh ve Mehmed Efendi b. İsmail nâm kimesneler ta‘rîfleriyle mu‘arrefe olan Safiye Hatun bt. Abdullah ile kebîre kızı Âişe Hatun bt. Salih Ağa ve mezbûre Âişe’nin li-ebeveyn er karındaşı Mehmed Çelebi b. Salih Ağa nâm kimesne[ler] meclis-i şer‘-i şerîf-i enverde mahmiye-i mezbûrede Alembey Mahallesi ahâlîsinden râfi‘u’l-kitâb Hasan Ağa b. Abdullah nâm kimesne mahzarında her biri ikrâr-ı tâm ve takrîr-i kelâm edip bundan akdem vefât eden mûrisimiz Salih Ağa’nın hayâtında bir mikdâr mahalli Haremeyni’ş-şerîfeyn Vakfı’ndan olmağla bi’l-icâreteyn tasarrufunda ve bir mikdâr mahalli dahi mülkü olan mahalle-i mezbûrede vâki‘ bir tarafdan el-Hâc Halil ve bir tarafdan Pîr Mehmed ve bir tarafdan Feyzullah mülkleri ve taraf-ı râbi‘i tarîk-i âm ile mahdûd hâriciyye ve dâhiliyeli menzilde vakıf olan mahalli bize ve mülk olan mahalli vâlidemiz hâzıra bi’l-meclis merkūme Safiye ile bize mevrûs ve müntakil oldukda vakıf olan mahallini ma‘rifet-i mütevellî ile mezbûr Hasan Ağa’ya bin dört yüz guruşa ferağ ve kasr-ı yed eylediğimizde mülk olan mahalli bin beş yüz guruş ider iken mezbûr Hasan Ağa bizi tağrîr etmekle yedi yüz elli guruş semen-i makbûza yedimizden iştirâ eyledi deyü merkūm Hasan Ağa’dan tağrîr ve gabn da‘vâ sadedinde olduğumuzda [96a] beynimize muslihûn tavassut edip da‘vâ-yı mezkûremizde mezbûr Hasan Ağa ile bizi beş yüz elli guruş üzerine inşâ-i akd-i sulh ettiklerinde biz dahi sulh-ı mezbûru kabûl ve bedel-i sulh olan beş yüz elli guruşu bi-kadri’l-hısas yedinden ahz u kabz edip menzil-i mahdûd-ı mezkûrun tağrîr ve gabn da‘vâsından mezbûr Hasan Ağa’nın zimmetini ibrâ ve iskāt eyledik. Fîmâ-ba‘d menzil-i mahdûd-ı mezkûrda kat‘â alâka ve medhalim kalmayıp vakıf olan mahalli hakk-ı müfevvezi ve mülk olan mahalli mülk-i müşterâsıdır dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mustafa Ağa b. Ahmed, İmâm Hasan Efendi b. ( ), Mehmed Hoca el-müezzin, Mehmed Çelebi b. Ali, İsmail b. Hasan, Molla Mehmed b. Şa‘ban el-kayyûm, Ali Çavuş b. Mustafa.