Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 319 Hüküm no: 380 Orijinal metin no: [33a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Begos v. Bedros’un miras malıyla ilgili, vârislerin açtığı davanın reddedildiği Ma‘rûz Medîne-i Üsküdar’a muzâfe Kartal kasabasında mütemekkin iken bundan ( ) sene mukaddem hâlik olan Begos v. Bedros zimmînin verâseti zevce-i metrûkesi Osekihan bt. Gaspar nâm Nasrâniye ile sulbî kebîr oğulları Karabet ve İstefan ve Bedros’a münhasıra ve tashîh meselesi yirmi dört sehm i‘tibârıyla üç sehmi zevcesi mersûmeye ve yedişer sehmden yirmi bir sehmi oğulları merkūm[ûna] isâbeti tahakkukundan sonra arzuhâlde ismi mezkûr merkūm Karabet zimmî medîne-i mezbûrede mahfil-i bâbda meclis-i şer‘-i hatîrde arzuhâl eden karındaşı merkūm Bedros zimmî muvâcehesinde babamız hâlik-i merkūmun bi’l-cümle terekesini hîn-i helâkinde ma‘rifet-i şer‘le tahrîr ve taksîm olunup hâlik-i merkūmun terekesinden bana isâbet eden ber-mûceb-i defter-i kassâm sekiz yüz seksen beş guruş hisse-i irsiyemi yedinden tamamen ahz ü kabz edip tereke-i hâlik-i merkūma ve bi’l-cümle hukūk-ı mîrâsa müte‘allika âmme-i de‘âvîden karındaşım mesfûrun zimmetini ibrâ ve ıskāt edip ol dahi ibrâmı kabûl eylediğini nâtık kıbel-i şer‘den yedine bir kıt‘a hüccet-i şer‘iye dahi i‘tâ olunup lâkin ibrâmdan mukaddem mâl-ı mevrûsumdan bâkī iki yüz on yedi guruş karındaşım merkūm Bedros zimmî zimmetinde olup hattâ târih-i i‘lâmdan yirmi iki gün mukaddem cihet-i mezkûreden iki yüz on yedi guruş bana deyni olduğunu ikrâr dahi etmekle hâlâ meblağ-ı merkūm iki yüz on yedi guruşu karındaşım merkūm Bedros zimmîden taleb ederim deyü da‘vâ ve merkūm Bedros ikrârını inkârından mâ‘adâ müdde‘î-i merkūmun takrîri üzere hâlik-i merkūmun terekesine ve hukūk-ı mîrâsa müte‘allika âmme-i de‘âvîden merkūm Bedros zimmînin zimmetini ibrâ ve ıskāt ol dahi ibrâsını kabûl eylediği müdde‘î-i merkūmun ikrârıyla sâbit ve bu misillü ba‘de’l-ibrâ ve’l-kabûl ikrâr da‘vâsı meşrû‘a olmamağla müdde‘î-i merkūm Karabet zimmî da‘vâ-yı mezkûresiyle karındaşı merkūm Bedros zimmîye bî-vech mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî ( ) min-S sene 1205