Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 320 Hüküm no: 382 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep bt. Salih’in boşandığı eşiyle mehir ve nafaka konusunda anlaştıkları Ma‘rûz Medîne-i Üsküdar’da Vâlide-i Atik mahallesinde sâkine mu‘arrefetü’z-zât Zeyneb bt. Salih nâm hatun medîne-i mezbûrede mahfil-i bâbda meclis-i şer‘-i hatîrde zevc-i mutallıkı es-Seyyid Salih Mehmed b. Abdullah mahzarında mezbûr es-Seyyid Salih Mehmed’in yirmi beş guruş mehr-i müeccel tesmiyesiyle zevce-i medhûlün-bihâsı iken târih-i i‘lâm günü beni tatlîk etmekle zimmetinde mütekarrir ve ma‘kūdün-aleyh olan mârrü’z-zikr yirmi beş guruş mehr-i müeccelim ile nafaka-i iddet-i ma‘lûmem ve meûnet-i süknâmı zevcim mezbûrdan taleb ederim deyü da‘vâ ol dahi cevâbında ber-vech-i muharrer ikrâr ü i‘tirâf etmeğin mûcebiyle mehr-i meblağ-ı merkūm yirmi beş guruşun müdde‘iye-i mezbûreye edâsıyla mezbûr es-Seyyid Salih Mehmed ilzâm olundukdan sonra müdde‘iye-i mezbûre Zeyneb Hatun’ı nafaka-i iddet-i ma‘lûme ve meûnet-i süknâsı için zevci mezbûr ile beş guruş üzerine terâzî eyledikleri bi’l-iltimâs huzûr-ı âlîlerine i‘lâm olundu. Fî 22 min-Safer sene 1205