Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 405 Hüküm no: 418 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Mustafa’nın yeniden Sivas menzilcisi olduğu Medîne-i Sivas menzilcisi olup Mahmiye-i İstanbul’da müsâfiren sâkin işbu bâ‘isü’l-kitâb es-Seyyid Mustafa b. es-Seyyid Yusuf meclis-i şer‘-i şerîf-i enverde Yeniil kazâsına tâbi‘ Kankal (Kangal) ve Tonos ve Aşudi ve Gürün nâhiyeleri ahâlîsinden kendi nefsinden asîl ve sâlifü’z-zikr nâhiyeler ahâlîsinden sâir mazbûtü’l-esâmî ve mahsûrü’l-eşhâs kimesneler tarafından husûs-ı âti’l-beyânda tasdîka vekîl-i şer‘îleri yine mahmiye-i mezbûrede müsâfiren sâkinler olan Ca‘fer b. İsmail ve Molla Ali b. Hüseyin ve Ebûbekir b. el-Hâc Osman ve Şeyh b. Mehmed ve Molla Veli b. Mehmed ve Hüseyin b. Mehmed ve Mustafa b. Ömer ve Molla Hasan b. Hüseyin ve Ebiroğlu Osman ve Ali b. Murad ve Veli b. Ali nâm kimesneler mahzarlarında ikrâr-ı tâm ve takrîr-i kelâm edip mezbûrûnun üzerlerine lâzım olan medîne-i mezbûre menzili için taraf-ı mîrîden ta‘yîn olunan ma‘lûmü’l-mikdâr bârgir ve in‘âmât ve yine bârgir iştirâsi’çün Haremeyni’ş-şerîfeyn tarafından verilen beş yüz guruşdan mâ‘adâ hâlâ medîne-i Sivas ahâlîsinden Zaralızâde Osman Ağa b. Hüseyin ve Seyyid Mehmed b. Hüseyin nâm kimesneler kefâletleriyle işbu sene-i selâse ve erba‘în ve mi’e ve elf rûz-ı Hızır’ı ibtidâsından sene-i âtîye rûz-ı Hızır’ı ibtidâsına gelince üç yüz altmış gün tamamına değin dört bin beş yüz guruşa menzilci olmak üzere mezbûrûna nefsimi îcâr ve teslîm ve hizmet-i mezkûreyi ber-vech-i muharrer edâya ta‘ahhüd ve iltizâm eylediğimde mezbûrûn dahi vech-i meşrûh üzere bi’l-asâle ve bi’l-vekâle istîcâr ve kabûl eylediklerinden sonra meblağ-ı mezbûr bin beş yüz guruşu merkūmûn bana def‘ ve teslîm ben dahi yedlerinden tamamen ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî selhi Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah, Ahmed b. Hasan, Mehmed b. Hasan, Ahmed b. Şa‘ban, İbrahim b. Mustafa.