Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 321 Hüküm no: 385 Orijinal metin no: [33b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ahmed b. Abdullah’ın kendisini bıçakla yaralayanlara açtığı diyet davasında sulh olup zimmetlerini ibra ettiği Ma‘rûz Mahrûse-i Galata muzâfâtından kasaba-i Kasımpaşa’da Yenikışla kurbünde kahveci tâbi‘i olup ber-vech-i âtî bıçak yarasıyla mecrûh idiği lede’l-keşf ve’l-mu‘âyene zâhir olan es-Seyyid Ahmed b. Abdullah medîne-i Üsküdar’da mahfil-i bâbda meclis-i şer‘-i hatîrde Kolancı İsmail b. Abdullah ve Keleş Mustafa b. Musa ve diğer Mustafa Reis b. Abdullah nâm kimesneler taraflarından ber-vech-i âtî tasdîka vekîlleri olan Bölükbaşı es-Seyyid Mehmed b. Halil muvâcehesinde müvekkilûn-ı merkūmûn İsmail ve Güleş Mustafa ve diğer Mustafa târih-i i‘lâmdan beş gün mukaddem ba‘de’l-asr medîne-i mezbûrede Mihrimah Sultan Câmi‘i kurbünde sağ kolum pazusu üzerinden bi-gayrı hakkın Yatağan bıçağı ile darb ve cerh etmekle mûcib-i şer‘îsini müvekkilûn-ı merkūmûndan hâlâ taleb ederim deyü tasaddî eylediği da‘vâsında bâ-tavassut-ı muslihîn otuz yedi guruş bedel-i makbûza sulh olup cerh-i mezkûra ve mâ-yuhdesü-minhe müte‘allıka âmme-i de‘âvîden müvekkilûn-ı merkūmûn İsmail ve Keleş Mustafa ve diğer Mustafa’dan herbirinin zimmetlerini ba‘de’l-ibrâ ve’l-kabûl kat‘-ı münâza‘a eyledikleri ba‘de’t-tescîl bi’l-iltimâs huzûr-ı âlîlerine i‘lâm olundu. Fî 15 min-Şa‘bân sene 1204