Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 322 Hüküm no: 386 Orijinal metin no: [33b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Ağa’nın vârislerinin Yenişehir hasları mukataası hissesi için açtıkları davanın Bâb-ı Âsafî’ye havale olunduğu Ma‘rûz Medîne-i Üsküdar’da İhsaniye mahallesinde sâkin iken bundan akdem vefât eden Mehmed Emin Ağa b. Süleyman’ın verâseti zevcesi Nefise bt. Abdullah nâm hatun ile sulbî kebîr oğlu Mehmed Sadık ve sulbiye kızı Âişe’ye inhisârı tahakkukundan sonra mezbûr Mehmed Sadık ile mezbûretân Nefise ve Âişe taraflarından vekîl olduğu zât-ı mezbûretânı ârifân Osman Ağa b. el-Hâc Ali ve es-Seyyid Ali Çavuş b. Mehmed nâm kimesneler şehâdetleriyle sâbit olan es-Seyyid Mehmed Şûhî b. Ali nâm kimesne medîne-i mezbûrede mahfil-i bâbda meclis-i şer‘-i hatîrde Mehmed Esad Ağa b. Hasan nâm kimesne mahzarında medîne-i Bursa civârında hâshâ-i Yenişehir-i Bursa mukāta‘asının rub‘ hissesi müteveffâ-yı mezbûrun hâl-i hayatında berât-ı âlî-şân ile tasarrufunda iken bin yüz doksan yedi senesi işbu mezbûr Mehmed Esad Ağa’ya üç bin iki yüz elli guruş bedel mukābelesinde ilzâm eyledikde ol dahi iltizâm ve kabûl ve bedel-i iltizâm olan meblağ-ı merkūm üç bin iki yüz elli guruş deyni olmak üzere mümzâ ve mahtûm bir kıt‘a temessük i‘tâ etmiş iken kable’l-edâ mezbûr Mehmed Emin Ağa vefât edip meblağ-ı merkūm veresesi müvekkillerim mezbûrûna mevrûs olmağla bi’l-vekâle taleb ederim deyü takrîrine mutâbık bir kıt‘a temessük ibrâzıyla da‘vâ ve mezbûr Mehmed Esad Ağa fi’l-hakīka mukāta‘a-i mezkûre hissesini müteveffâ-yı mezbûrdan ol-mikdâr bedel mukābelesinde iltizâm ve bedel-i mezkûr için temessük verdiğini ikrâr lâkin mukāta‘a-i mezkûrenin âhar hissedârları tarafından bana zabt ettirmeyip âhar mültezim yediyle zabt olunmuş idi deyü zabt ve ta‘şîrini inkâr ve vekîl-i mezbûrun arzuhâli bâlâsında Çarşamba günü huzûr-ı âsafîde terâfu‘-ı şer‘ olunmak bâbında sâdır olan fermân-ı âlî-şâna imtisâlen terâfu‘a havâle olunup henüz da‘vâlarına faysal verilmediği cerîdede mazbût ve mukayyeddir. Fî 14 min-S sene 1205