Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 323 Hüküm no: 387 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah Efendi’nin boşandığı hanımı Emine’de emanet olarak kalan eşyalarının verilmesi talebiyle açtığı davayı ispat edemediği Ma‘rûz Medîne-i Üsküdar’da Hasanağa mahallesi sükkânından olup hâlâ Bahr-ı Sefîd’de Eğriboz Cezîresi’nde sâkin olan Feyzullah Efendi b. İbrahim b. Abdullah nâm kimesne tarafından ber-vech-i âtî taleb ve da‘vâ ve ahz ü kabza bâ-hüccet-i şer‘iye kabûlüne mevkūfe vekîl olduğu Hasan Ağa b. Hızır ve Mehmed Ağa b. Halil nâm kimesneler şehâdetleriyle sâbit olan es-Seyyid Osman Efendi [b.] es-Seyyid Mehmed nâm kimesne medîne-i mezbûrede mahfil-i bâbda meclis-i şer‘-i hatîrde müvekkil-i mezbûrun Sâbıkā zevcesi zâtı mu‘arrefe Emine bt. Yusuf nâm hatun muvâcehesinde müvekkilim mezbûr Feyzullah Efendi mezbûre Emine Hatun ile zevciyet beynlerinde kāime iken târih-i i‘lâmdan iki sene mukaddem diyâr-ı âhara azîmet ve ma‘an sâkin oldukları menzilde mevcûd eşyâ-i memlûkesinden mecmû‘-ı kıymetleri üç yüz altmış üç guruşa bâliğ bir tepsi ve bir sîm zarf ve fağfûr ve sâde üç fincan ve bir kehribârlı duhân çubuğu ve iki enfiye kutusu ve otuz dört zirâ‘ Ankara şalîsi ve bir çinilik? ve bir çift baş şemsesi ve iki yorgan yüzü ve dört top bez ve sekiz Kıbrıs yasdığı ve on havlu ve bir sofra ve bir peşkir ve iki kat cedîd câmeşûy ve yirmi yağlık ma‘a uçkur ve bir kaftan ve bir entari ve iki şilte ve dört boğça ve sagīr ve kebîr dört şerbet ibriği ve çiçekli ve basma üç yorgan ve bir kahve kutusu ve bir kebîr garâr ve bir leğen ma‘a ibrik ve bir âbdest leğeni ve bir münakkaş havlu ve bir tenceresini mezbûre Emine Hatun yedine bi-tarîki’l-âriye vaz‘ ve teslîm eylediğinden mâ‘adâ bir kıt‘a mukāta‘a berâtı ve bir kıt‘a deyn temessüğü ve kırk akçeli memhûr ta‘bîr olunur bir ulûfe tezkiresini dahi bi-tarîki’l-emâne yedine vaz‘ ve teslîm edip hâlâ yedinde olmağla bi’l-vekâle taleb ederim deyü ba‘de’d-da‘vâ ve’l-istintâk ve’l-inkâr müdde‘î-i vekîl-i mezbûr ber-vech-i muharrer müdde‘âsını ızhâr-ı acz edip talebiyle mezbûre Emine Hatun gıbbe’t-tahlîfi’ş-şer‘î mûcebiyle müdde‘î-i vekîl-i mezbûr es-Seyyid Osman Efendi da‘vâ-yı mezkûresiyle mezbûre Emine Hatun’a bilâ-beyyine mu‘ârazadan men‘ olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 5 min-S sene 1205