Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 325 Hüküm no: 391 Orijinal metin no: [34a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’ın Reis mahallesi ahalisinin uygunsuz hareketleri olan Ali’nin mahalleden ihraç edilmesini talep ettikleri Ma‘rûz Medîne-i Üsküdar’da Reis mahallesi imâmı Ahmed Efendi b. Ahmed ve ahâli-i mahalleden eşrâf-ı kuzâtdan Mehmed Emin Efendi b. Ahmed ve Mehmed Çelebi b. Mustafa ve Ömer Ağa b. Osman ve Ahmed b. Mehmed ve Hafız Hüseyin Efendi b. İbrahim ve Hafız Osman b. el-Hâc İsmail ve Ali b. İsmail ve diğer Ali b. Veli ve es-Seyyid Süleyman b. Mustafa ve Mehmed Emin b. Mehmed ve Mustafa Ağa b. Mehmed ve Mehmed b. Halil ve İsmail b. Osman nâm kimesneler bi-ecma‘ihim medîne-i mezbûrede mahfil-i bâbda meclis-i şer‘-i hatîrde yine mahalle-i mezbûrede sâkin Ali b. Mehmed Said nâm kimesne mahzarında mezbûr Ali kendi hâlinde olmayıp dâimâ sekrân olduğu hâlde âlet-i harble mahalle-i mezbûrede geşt ü güzâr ve bî-gayri hakkın menzillerimize taş atıp ve bize elfâz-ı kabîha ile şetm ve ehl-i ırz nisvânın ırzlarına ta‘arruz etmekle mezbûr Ali’den bi’l-külliye emniyetimiz meslûb olmuşdur deyü ef‘âl-i kabîha ve harekât-ı nâ-meşrû‘asını muvâcehesinde ihbâr ve mahalle-i mezbûreden ihrâc olunmak bâbında fermân-ı âlîleri sudûrunu herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 7 min-şehri Rebî‘ülevvel sene 1204