Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 326 Hüküm no: 394 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Ali’nin bağına girip üzümlerini aldıkları iddiasıyla Panço ile Kazer’e açtığı tazminat davasını ispat edemediği Ma‘rûz Mevâdd-ı şer‘iye istimâ‘ı’çün kıbel-i şer‘-i şerîfden meb‘ûs Abdullah Efendi dâ‘îleri medîne-i Üsküdar’a tâbi‘ Çenger karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde karye-i mezbûrede sâkin Bostanî Ali b. Ömer nâm kimesne meclis-i ma‘kūd-ı mezkûrda Panço v. İstefan ve Kazer v. Azat nâm zimmîler muvâcehelerinden merkūmân Panço ve Kazer zimmîler bundan akdem karye-i mezbûre hâricinde vâki‘ ma‘lûmü’l-hudûd dört kıt‘a bağıma duhûl ve derûnlarında mevcûd kırk [bir] guruş kıymetli üzümümü herbiri bi-gayrı hakkın kat‘ ve âhara bey‘le istihlâk etmeleriyle kıymeti olan merkūm kırk bir guruşu merkūmândan taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını isbâta kādir olamayıp talebiyle merkūmân Panço ve Kazer zimmîlerden herbiri gıbbe’t-tahlîfi’ş-şer‘î mûcebiyle müdde‘î-i mezbûr da‘vâ-yı mezkûresiyle merkūmân Panço ve Kazer zimmîlerden herbirine bilâ-beyyine mu‘ârazadan men‘ olunduğu ba‘de’l-inhâ bi’l-iltimâs huzûr-ı âlîlerine i‘lâm olundu. Fî 6 min-Ra sene 1205