Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 406 Hüküm no: 419 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden İpekçi Müezzin es-Seyyid Süleyman’ın vârisi olan kardeşi Berber Ahmed Çelebi’ye terekeden hissesinin verilmesi Mahmiye-i İstanbul’da Küçük Ayasofya Mahallesi’nde sâkin iken bundan akdem vefât eden Kazzâz Müezzin es-Seyyid Süleyman Çelebi b. Mehmed b. Ahmed nâm kimesnenin verâseti zevce-i menkûha-i metrûkesi Hadice bt. Abdullah nâm hatun ile li-ebeveyn er karındaşı olup mahrûse-i Edirne’de Karaca Bevvâb Mahallesi ahâlîsinden gāib ani’l-meclis Berber Ahmed Çelebi’ye münhasıra ve tashîh-i mes’elesi dört sehmden olup sihâm-ı mezbûreden bir sehmi zevcesi mezbûre Hadice’ye ve üç sehmi karındaşı gāib-i merkūm Berber es-Seyyid Ahmed Çelebi’ye isâbet ve intikāl eylediği şer‘an zâhir ve mütehakkık oldukdan sonra gāib-i merkūm tarafından ber-vech-i âtî vekâlet iddi‘â eden işbu hâzır bi’l-meclis Mustafa Beşe b. Hüseyin meclis-i şer‘-i şerîf-i enverde müteveffâ-i mezbûrun zevce-i metrûkesi [ve] terekesine vâzı‘atü’l-yed olan merkūme Hadice bt. Abdullah nâm hatun muvâcehesinde bi’l-vekâle üzerine da‘vâ ve takrîr-i kelâm edip zevcin olduğu hâlde bundan akdem vefât eden merkūm Kazzâz es-Seyyid Süleyman Halîfe b. Mehmed b. Ahmed’in li-ebeveyn er karındaşı olup [96b] tereke-i müteveffâ-i mezbûrdan kendiye isâbet eden hisse-i irsiyyesi tereke-i müteveffâ-i mezbûra vâzı‘u’l-yed olanlardan taleb ve da‘vâ ve ahz u kabz ve kendiye îsâle ve lede’l-iktizâ sulh ve ibrâya ve bunlar mütevakkıf olduğu umûrun küllîsine tarafından beni vekîl ve nâib-i menâb nasb ve ta‘yîn ve ben dahi ber-vech-i muharrer kabûl etmişidim işbu mezbûre Hadice Hatun müteveffâ-i mezbûrun zevce-i metrûkesi olup tereke-i müteveffâ-i mezbûra vâzı‘atü’l-yed olmağla müvekkil-i merkūmun hisse-i irsiyyesini mezbûre Hadice Hatun’dan bi’l-vekâle taleb ederim suâl olunsun dedikde gıbbe’s-suâl ve’l-inkâr vekîl-i mezbûrdan ber-vech-i muharrer müdde‘âsına beyyine taleb olundukda udûl-i ahrâr-ı ricâl-i Müslimînden mahrûse-i Edirne mahallâtından zikrolunan Karaca Bevvâb Mahallesi ahâlîsinden Mağsan Beşe b. Mehmed ve Mustafa Bey b. Ahmed ve Ömer Beşe b. Halil ve Mehmed Beşe b. Hasan nâm kimesne[ler] li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu hâzıra bi’l-meclis Hadice bt. Abdullah’ın zevci olup bundan akdem vefât eden Kazzâz es-Seyyid Süleyman Halîfe b. Mehmed b. Ahmed mahrûse-i Edirne’de zikrolunan Karaca Bevvâb Mahallesi ahâlîsinden müvekkil-i mezbûr es-Seyyid Ahmed Çelebi b. Mehmed b. Ahmed’in li-ebeveyn er karındaşı olup terekesine müstahik âhar olduğu ma‘lûmumuz değildir ve müteveffâ-i mezbûrun terekesine vâzı‘u’l-yed olanlardan müvekkil-i merkūmun hisse-i irsiyyesini ahz u kabzına ve kendiye îsâle ve lede’l-iktizâ sulh ve ibrâya ve bunlar mütevakkıf olduğu umûrun küllîsine tarafından işbu Mustafa Beşe’yi vekîl ve nâib-i menâb nasb ve ta‘yîn edip ol dahi ber-vech-i muharrer vekâlet-i mezbûreyi kabûl ve merâsimini kemâ-yenbagī edâya ta‘ahhüd ve iltizâm eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın vekâletine ba‘de’l-hükm mûcebiyle tereke-i müteveffâ-i mezbûrdan müvekkil-i mezbûrun hisse-i irsiyyesini vekîl-i merkūma def‘ ve teslîm[e] mezbûre Hadice Hatun’a tenbîh-birle mâ-vaka‘a bi’t-taleb ketb olundu. Fi’l-yevmi’s-sâlis min-Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: Mustafa Efendi b. Ahmed, Mehmed Efendi b. Mehmed, Mustafa Efendi b. Ali, İmâmzâde Mustafa Efendi, Mehmed Efendi b. Ahmed, Mustafa Beşe b. Ahmed, Mehmed Beşe b. Ali, Mehmed Çelebi b. Şa‘ban, Salih Çelebi b. Mehmed, Şatır Hüseyin b. Ahmed.