Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 329 Hüküm no: 400 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin’in kaybolan cariyesi Zenciye Sipahi’yi elinde bulunduran Kuzguncuk Subaşısı Mustafa’nın cariyeyi sahibine iadesi Ma‘rûz Medîne-i Üsküdar’da Hamzafakih mahallesinde sâkin Mehmed Emin b. Kasım medîne-i mezbûrede mahfil-i bâbda meclis-i şer‘-i hatîrde zikri âtî câriyeye abıka olmak üzere vâzı‘ü’l-yed olan medîne-i mezbûreye tâbi‘ Kuzguncuk karyesi subaşısı ve zâbit-i avâbık olan Mustafa b. Abdurrahman nâm kimesne tarafından vekîl-i şer‘îsi olan Yazıcı el-Hâc Hasan b. Süleyman nâm kimesne mahzarında işbu mu‘âyene olunan Zenciyyetü’l-asl Müslimetü’l-mille Sipâhî nâm câriye yedimde mülküm iken târih-i i‘lâmdan bir gün mukaddem yedimden ibâk edip mezbûr Mustafa yedinde bulmamla bi’l-istihkāk hâlâ taleb ederim deyü da‘vâ ol dahi cevâbında zikr olunan câriyeyi müvekkilim mezbûr abıka olmak üzere ahz ve işhâd etmiş idi deyü vaz‘-ı yedini ikrâr lâkin müdde‘î-i mezbûrun mülkü olduğunu inkâr etmeğin müdde‘î-i mezbûr Mehmed Emin ber-vech-i muharrer müdde‘âsını udûlden el-Hâc Mehmed b. İbrahim ve Mustafa b. İsmail nâm kimesneler şehâdetleriyle ber-nehc-i şer‘î mezbûr el-Hâc Hasan muvâcehesinde ba‘de’l-isbât ve’l-half mûcebiyle câriye-i mevsûfe-i mezbûreyi müdde‘î-i mezbûr Mehmed Emin’e teslîme vekîl-i mezbûr el-Hâc Hasan’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 21 min-L sene 1204