Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 329 Hüküm no: 401 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah’ın alacağını ödemesi talebiyle Üsküdar Subaşısı Mehmed Efendi’ye açtığı davayı ispat edemediği Ma‘rûz Medîne-i Üsküdar’da Arakıyeci el-Hâc Mehmed mahallesinde sâkin es-Seyyid Abdullah b. Bekir nâm kimesne medîne-i mezbûrede mahfil-i bâbda meclis-i şer‘-i hatîrde Sâbıkā Üsküdar Subaşısı Mehmed Efendi b. Ahmed mahzarında mezbûr Mehmed Efendi târih-i i‘lâmdan on sene mukaddem gāib ani’l-meclis İspir Ağa nâm kimesne zimmetinde cihet-i karz-ı şer‘îden bâ-i‘lâm-ı şer‘î mahkûmün-bih hakkım olan iki yüz on sekiz guruşu tamamen tahsîl ve ahz edip yüz altmış üç guruşu yedinden ahz ve elli beş guruşu mezbûr Mehmed Efendi zimmetinde bâkī kalmağla taleb ederim deyü da‘vâ ve mezbûr Mehmed Efendi bi’l-külliye inkâr etmeğin müdde‘î-i mezbûr ber-vech-i muharrer müdde‘âsını isbâta kādir olamayıp bi’t-taleb mezbûr Mehmed Efendi gıbbe’t-tahlîfi’ş-şer‘î mûcebiyle müdde‘î-i mezbûr husûs-ı mezkûrda mezbûr Mehmed Efendi’ye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 9 min-Zilka‘de sene 1204