Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 407 Hüküm no: 420 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Mustafa b. Mehmed’den boşanan Ayşe Hatun bt. Mehmed’in mehrini tamamen aldığı Muhâla‘a. Mahmiye-i İstanbul’da İshakpaşa Mahallesi sâkinelerinden olup zâtı mahalle-i mezbûre imâmı Ahmed Efendi b. Ali ve Osman Çelebi b. Ali nâm kimesneler ta‘rîfleriyle mu‘arrefe olan Âişe Hatun bt. Mehmed meclis-i şer‘-i hatîr-i lâzımü’t-tevkīrde zevc-i sâbıkı işbu bâ‘isü’l-kitâb Mustafa b. Mehmed nâm kimesne mahzarında ikrâr ve takrîr-i kelâm edip mezbûr Mustafa zevcim olup beynimizde hüsn-i mu‘âşeretimiz olmamağla târih-i kitâb günü [-beni] bâyinen tatlîk ve zimmetinde mütekarrir ve ma‘kūdun-aleyh olan bin iki yüz akçe mehr-i müeccelimi işbu meclis-i şer‘de tamamen bana edâ ve teslîm ben dahi yedinden ahz u kabz eylediğimden sonra nafaka-i iddetim için dahi bi’t-terâzî ta‘yîn olunan dörder parayı kül-yevm bana def‘ ve teslîm etmek üzere ta‘ahhüd eylediğinden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: Ahmed Efendi b. Ali imâm-ı mahalle-i mezbûr, Osman Çelebi b. Ali, Musa Ağa b. Hasan, Ahmed Bey b. Abdüllatif, Mehmed Çelebi b. Ömer, Mehmed Çelebi b. Abdullah bölükbaşı, İbrahim Çelebi b. Mustafa du‘âcı, Kerpicî Abdullah Çelebi.