Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 408 Hüküm no: 421 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Mustafa b. Mehmed’den boşanan Ayşe bt. Mehmed’in yanındaki çocukları Hadice ve Hafize’ye nafaka bağlanması Nafaka. Mahmiye-i İstanbul’da İshakpaşa Mahallesi sâkinelerinden olup zâtı mahalle-i mezbûre imâmı Ahmed Efendi b. Ali ve Osman Çelebi b. Ali nâm kimesneler ta‘rîfleriyle mu‘arrefe olan bâ‘isetü hâzihi’l-vesîka Âişe bt. Mehmed nâm hatun meclis-i şer‘-i hatîr-i lâzımü’t-tevkīrde zevc-i sâbıkı Mustafa b. Mehmed nâm kimesne mahzarında takrîr-i kelâm ve tâ‘bir ani’l-merâm edip mezbûr Mustafa’nın firâşından hâsıla ve benden mütevellide olup bi-hakkı’l-hıdâne hacr [ve] terbiyelerimde olan işbu sadriye sagīre kızlarım Hadice ve Hâfize nâm sagīrelerin nafaka ve kisveye ihtiyâcları olmağla kıbel-i şer‘den babası mezbûr Mustafa üzerine kadr-i kifâye meblağ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -sûba [tûbâ]-lehû ve hüsnü meâb-hazretleri dahi sagīretân mezbûretânın nafaka ve kisve-bahâlarıyçun târih-i kitâbdan babaları mezbûr Mustafa üzerine bi’t-terâzî beher yevm yedişer buçuk akçeden on beş akçe farz ve takdîr edip meblağ-ı mefrûz-ı mezbûru sagīretân-ı mezbûretânın nafaka ve kisve ve sâir levâzım-ı zarûriyyelerine harc ve sarfa ve lede’l-iktizâ istidâneye ve inde’z-zafer babası mezbûr Mustafa üzerine rücû‘a mezbûre Âişe Hatun’a izin verilmeğin mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: Ahmed Efendi b. Ali imâm-ı mahalle-i mezbûr, Osman Çelebi b. Ali, Musa Ağa b. Hasan, Ahmed Bey b. Abdüllatif, Mehmed Çelebi b. Ömer.