Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 336 Hüküm no: 416 Orijinal metin no: [36a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Ali’nin küçük kızları Hafize’nin nafaka bedelinden biriken parayı boşandığı hanımına ödemesi Ma‘rûz Medîne-i Üsküdar’da Vâlide-i Atik mahallesinde sâkine ve zâtı mu‘arrefe Hadice bt. Mehmed nâm hatun medîne-i mezbûrede mahfil-i bâbda meclis-i şer‘-i hatîrde zevc-i sâbıkı İbrahim b. Ali mahzarında zevc-i sâbıkım mezbûr İbrahim’in firâşından hâsıl ve benden mütevellide kızım Hafize nâm sagīrenin nafaka ve kisvesi için bâ-hüccet-i şer‘iye kıbel-i şer‘den takdîr ettirdiğim beher yevm onar akçe nafaka-i mefrûza-i müstedânemden bin iki yüz üç senesi Zilhicceti’ş-şerîfe’sinin on birinci gününden dört senesi Şa‘bân’ı gāyetine gelince sekiz buçuk aylık zimmetinde müctemi‘ olan yirmi bir guruş bir rub‘ hakkımı taleb ederim deyü da‘vâ ve mezbûr İbrahim cevâbında ber-vech-i muharrer ikrâr lâkin meblağ-ı mezbûr yirmi bir guruş bir rub‘un beş guruş bir rub‘unu müdde‘iye-i mezbûreye edâ ve teslîm edip zimmetimde on altı guruş deynim bâkī kalmış idi deyü ba‘de’d-def‘ ve’l-inkâr mezbûr İbrahim def‘ini isbâta kādir olamayıp talebiyle müdde‘iye-i mezbûre gıbbe’t-tahlîfi’ş-şer‘î mûcebince meblağ-ı merkūm yirmi guruş bir rub‘u müdde‘iye-i mezbûre Hadice Hatun’a edâ ve teslîme mezbûr İbrahim’e tenbîh olunduğu bi’l-iltimâs huzûr-ı âlîlerine i‘lâm olundu. Fî 20 min-Ra sene 1205