Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 337 Hüküm no: 418 Orijinal metin no: [36a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaralanan İbrahim b. Abdullah’ın iki yerinden kurşunlandığının tesbit edildiği Ma‘rûz Medîne-i Üsküdar’da Selami mahallesinde vâki‘ el-Hâc Selim Ağa Hammamı’nda sâkin İbrahim b. Abdullah kimesne medîne-i mezbûrede mahfil-i bâbda meclis-i şer‘-i hatîrde bast-ı kelâm ve ifâde-i merâm edip târih-i i‘lâm günü hamam-ı mezkûr kurbünde kahveci [dükkâ]nı derûnunda ismi ma‘lûmum olmayan kalyoncu neferâtından bir kimesne bi-gayrı hakkın piştov kurşunuyla sol küreğim altından ve sol böğrüm üzerinden iki yerinden darb ve cerh etmekle kıbel-i şer‘-i şerîfden keşf ve mu‘âyene olunmak matlûbumdur dedikde cerrâh tâifesinden el-Hâc Ali Efendi ve sâir mazbûtü’l-esâmî kimesneler ile mezbûr İbrahim’in a‘zâsına nazar olundukda fi’l-hakīka mezbûr İbrahim sol küreği altından ve sol böğrü üzerinden iki yerinden kurşun yarasıyla mecrûh olduğu ba‘de’l-keşf ve’l-mu‘âyene vâki‘ hâl bi’l-iltimâs huzûr-ı âlîlerine i‘lâm olundu. Fî 22 min-Ra sene 1205