Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 339 Hüküm no: 423 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. İbrahim’in koyun bedelinden kalan borcunu ödemesi Ma‘rûz Medîne-i Üsküdar’da Davudpaşa mahallesi sükkânından Bakkāl Bekir Beşe b. Mehmed ve Arnabud Mehmed Emin b. İbrahim ve Mustafa b. Mehmed nâm kimesneler medîne-i mezbûrede mahfil-i bâbda meclis-i şer‘-i hatîrde Osman b. İbrahim nâm kimesne mahzarında mezbûr Osman târih-i i‘lâmdan üç ay mukaddem yedimizden ve mâlımızdan iştirâ ve kabz eylediği adedi ve fiyâtı beynimizde ma‘lûm koyun semeninden iki bin iki yüz altmış dokuz guruş hakkımızın iki bin yüz altmış dört guruşunu yedinden ahz ve bâkī yüz guruş zimmetinde hakkımızın yetmiş guruşu mutâlebesinden mezbûr Osman’ın zimmetini ibrâ ve ıskāt eylediğimizde ol dahi ibrâmızı kabûl etmekle bâkīsi olan otuz beş guruşu hâlâ taleb ederiz deyü herbiri da‘vâ ol dahi cevâbında ber-vech-i muharrer ikrâr ü i‘tirâf etmeğin mûcebiyle meblağ-ı bâkī-i merkūm otuz beş guruşun mezbûrûna edâsıyla mezbûr Osman ilzâm olunduğu bi’l-iltimâs huzûr-ı âlîlerine i‘lâm olundu. Fî 16 min-Ra sene 1205