Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 339 Hüküm no: 424 Orijinal metin no: [36b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Lazari’nin alacak iddiasıyla açtığı davayı ispat edemediği Ma‘rûz Medîne-i Üsküdar’da Balaban İskelesi’nde vâki‘ yağhânede mütemekkin Yağcı Lazari v. Yorgi nâm zimmî medîne-i mezbûrede mahfil-i bâbda meclis-i şer‘-i hatîrde Mustafa b. Ahmed nâm kimesne mahzarında gāib ani’l-meclis Ali b. Abdullah zimmetinde cihet-i deyn-i şer‘îden dokuz guruş hakkım olup gāib-i mezbûr dahi deyn-i mezkûr dokuz guruş ile beni mezbûr Mustafa üzerine havâle-i mutlaka ile havâle ve herbirimiz havâle-i mezkûreyi kabûl etmekle cihet-i havâleden meblağ-ı merkūm dokuz guruş ile târih-i i‘lâmdan iki sene mukaddem yedimden iştirâ ve kabz eylediği vezn ve fiyâtı beynimizde ma‘lûm küftün semeninden yirmi dokuz guruş ki cem‘an otuz sekiz guruş zimmetinde hakkım olmağla taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını isbât edemeyip bi’t-taleb mezbûr Mustafa gıbbe’t-tahlîfi’ş-şer‘î mûcebiyle müdde‘î-i merkūm Lazari zimmî da‘vâ-yı mezkûresiyle mezbûr Mustafa’ya bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî-gurrei M sene 1205