Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 409 Hüküm no: 422 Orijinal metin no: [97a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraylı Hadice Hanım ile kocası el-Hâc Ahmed’in muhala‘a yoluyla boşandıkları Muhâla‘a. Mahmiye-i İstanbul’da Kabasakal Mahallesi’nde sâkine Sarâyî Hadice bt. Abdullah b. Abdurrahman nâm hatun tarafından husûs-ı âti’l-beyâna vekîl olduğu zâtını ârifân el-Hâc Osman b. Mehmed ve Ahmed Ağa b. Mustafa nâm kimesneler şehâdetleriyle şer‘an sâbit olan fahrü’l-a‘yân ağa babası el-Hâc Mustafa Ağa b. İbrahim meclis-i şer‘-i şerîfde zevci bâ‘isü hâze’l-kitâb el-Hâc Ahmed b. Mehmed mahzarında bi’l-vekâle ikrâr ve takrîr-i kelâm edip bundan akdem müvekkile-i mezbûre mezbûr el-Hâc Ahmed’in zevce-i menkûhası olup beynlerinde hüsn-i mu‘âşeretleri olmamağın zimmetinde mütekarrir ve ma‘kūdun-aleyh iki yüz guruş mehr-i müeccel ve nafaka-i iddet-i ma‘lûmesi üzerlerine meûnet-i süknâsı dahi kendi üzerine olmak üzere zevci mezbûr el-Hâc Ahmed ile bi’l-vekâle muhâla‘a-i sahîha-i şer‘iyye ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i de‘âvî ve mütâlebât ve muhâsamâtdan her biri âharı ibrâ ve iskāt eyledi. Min-ba‘d birbirleriyle kat‘â da‘vâ ve nizâ‘ ve husûmetleri kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: El-hâc Mehmed b. Hasan, el-Hâc Mehmed b. el-Hâc Mehmed, Molla Hasan b. Mustafa, el-Hâc Mustafa b. Abdulkādir, Hüseyin b. Mehmed.