Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 341 Hüküm no: 428 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Hasan’a borcu olan Sedri v. Tanaş’ın borcunu ödemesi Ma‘rûz Mahmiye-i İslâmbol’da Tüfenkhâne kurbünde sâkin Hüseyin b. Hasan nâm kimesne medîne-i Üsküdar’da mahfil-i bâbda meclis-i şer‘-i hatîrde Sedri v. Tanaş nâm zimmî muvâcehesinde merkūm Sedri zimmî ile şerîki gāib ani’l-meclis Salih nâm kimesne târih-i i‘lâmdan bir sene mukaddem yedimden ve mâlımdan bi’l-münâsafa iştirâ ve kabz eyledikleri kıyye ve fiyâtı beynimizde ma‘lûm zift semeninden yetmiş guruş hakkımın kırk sekiz guruşunu şerîki Salih yedinden ve sekiz guruşunu merkūm Sedri yedinden ki cem‘an elli altı guruşunu ahz ü istifâ ve bâkī on dört guruş ile yine beynimizde ma‘lûm ancak merkūm Sedri yedimden iştirâ ve kabz eylediği kızılcık ağacı semeninden üç buçuk guruş ki cem‘an on yedi guruş hakkımı merkūm Sedri zimmîden taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı bâkī-i merkūm on yedi buçuk guruşun edâsıyla merkūm Sedri zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 28 min-Z sene 1204