Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 342 Hüküm no: 429 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İbrahim’e borcu kalan Fatma bt. Hüseyin’in borcunu ödemesi Ma‘rûz Medîne-i Üsküdar’da Selami mahallesinde sâkin es-Seyyid İbrahim b. Ahmed nâm kimesne medîne-i mezbûrede mahfil-i bâbda meclis-i şer‘-i hatîrde mu‘arrefetü’z-zât Fatıma bt. Hüseyin nâm hatun mahzarında mezbûre Fatıma Hatun bundan akdem emlâkından bir çiçekli entari ve yedi guruşluk bir altınını bana rehin vaz‘ıyla yedimden istikrâz ve kabz eylediği yetmiş guruş hakkımın otuz sekiz guruşunu yedinden ahz ü kabz ve otuz iki guruş bâkī zimmetinde hakkım kalmağla fekk-i rehn birle meblağ-ı merkūm otuz iki guruşu taleb ederim deyü da‘vâ ve mezbûre Fatıma Hatun cevâbında müdde‘î-i merkūma cihet-i merkūmeden yetmiş guruş deyni olduğunu ikrâr lâkin müdde‘î-i mezbûrun kabzını mu‘terif olduğu otuz sekiz guruşdan mâ‘adâ müdde‘î-i merkūma bilâ-devr mahz-ı ribâ olmak üzere otuz bir buçuk guruş dahi def‘ ü teslîm edip zimmetimde ancak yirmi para deynim bâkī kalmışdır deyü ba‘de’d-def‘ müdde‘î-i mezbûr dahi cevâbında ancak murâbaha nâmıyla dört buçuk guruş ahzını ikrâr ziyâde yirmi yedi guruşu inkâr etmeğin mezbûre Fatıma Hatun ber-vech-i muharrer ziyâde murâbaha da‘vâsını isbâtdan âcize olmağın talebiyle müdde‘î-i mezbûr es-Seyyid İbrahim gıbbe’t-tahlîfi’ş-şer‘î mûcebiyle meblağ-ı bâkī-i merkūm yirmi yedi buçuk guruşu müdde‘î-i mezbûr es-Seyyid İbrahim’e edâ ve teslîme mezbûre Fatıma Hatun’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 23 min-Ca sene 1204