Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 342 Hüküm no: 430 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Marat’ın bakkal Avrail ve Yuvakim’de hizmet bedeli olarak alacak iddiasıyla açtığı davada sulh olduğu Ma‘rûz Bakkāl tâifesinden Marat v. Remed nâm zimmî medîne-i Üsküdar’da mahfil-i bâbda meclis-i şer‘-i hatîrde Avrail v. Kayser ve Yuvakim v. Melo nâm zimmîler muvâcehelerinde merkūmân Avrail ve Yuvakim zimmîlerin medîne-i mezbûrede Gülfamhatun mahallesinde vâki‘ bakkāl dükkânlarında ücret kavlinsiz on iki ay hizmet etmemle şühûr-ı mezkûrede sebkat eden hizmetimin ecr-i mislini taleb ederim deyü da‘vâ ve beynlerinde ba‘de vukū‘ı’l-münâza‘a bâ-tavassut-ı muslihîn müdde‘î-i mezbûr da‘vâ-yı mezkûresinden beş bin altı yüz akçe bedel-i makbûza sulh olup ecr-i misline müte‘allika âmme-i de‘âvîden merkūmân Avrail ve Yuvakim zimmîlerin zimmetlerini ibrâ ve ıskāt eylediğinde onlar dahi bedel-i sulha müte‘allika âmme-i de‘âvîden müdde‘î-i merkūmun zimmetini ibrâ ve ıskāt ve herbiri âharın ibrâsını kabûl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 14 min-L sene 1204