Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 343 Hüküm no: 431 Orijinal metin no: [37a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in vefat eden kocası Seyyid Mahmud Bey’den alacağını ispat ettiğinden karşılığının terekeden ödenmesi Ma‘rûz Medîne-i Üsküdar’a tâbi‘ Bulgurlu karyesinde subaşı iken bundan akdem vefât eden es-Seyyid Mahmud Bey b. İbrahim b. Abdullah’ın verâseti zevce-i menkûhası Âişe bt. Mehmed nâm hatun ile sulbiye kebîre kızı Şerife Rahime Hatun’a münhasıra olduğu tahakkukundan sonra zâtı mu‘arrefe zevce-i mezbûre Âişe Hatun medîne-i mezbûrede mahfil-i bâbda meclis-i şer‘-i hatîrde tereke-i müteveffâ-yı mezbûra bi’l-verâse vâzı‘atü’l-yed olan kezâlik zâtı mu‘arrefe mezbûre Rahime Hatun mahzarında zevcim müteveffâ-yı mezbûr es-Seyyid Mahmud Bey hâl-i hayatında mâlımdan ve yedimden üç yüz guruş istikrâz ve kabz etmekle meblağ-ı merkūm üç yüz guruş bana deyni olduğunu müteveffâ-yı mezbûr es-Seyyid Mahmud Bey hayatında huzûr-ı Müslimînde ikrâr ve işhâd dahi etmiş iken kable’l-edâ fevt olmağla terekesinden taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre Âişe ber-vech-i muharrer müdde‘âsını udûlden İmâm Mehmed Emin Efendi b. el-Hâc Mehmed ve Süleyman Ağa b. Ali nâm kimesneler şehâdetleriyle muvâcehesinde vech-i şer‘î üzere ba‘de’l-isbât ve’t-tahlîf mûcebiyle deyn-i meblağ-ı merkūm üç yüz guruş müteveffâ-yı mezbûrun terekesinden şer‘an lâzım geldiği bi’l-iltimâs huzûr-ı âlîlerine i‘lâm olundu. Fî 21 min-M sene 1205