Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 343 Hüküm no: 432 Orijinal metin no: [37a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cizyedar Hasan Ağa’nın cizye evrakı bedelinden Seyyid İsmail’de olan alacağının ödenmesi Ma‘rûz Medîne-i Üsküdar sükkânından ve bin iki yüz dört senesi medîne-i mezbûrede Cizyedâr Hasan Ağa b. Hüseyin nâm kimesne medîne-i mezbûrede mahfil-i bâbda meclis-i şer‘-i hatîrde es-Seyyid İsmail b. İbrahim nâm kimesne mahzarında mezbûr es-Seyyid İsmail sene-i mezbûrede cânib-i mîrîden cibâyetine memûr olduğum cizye evrâkından yedimden ahz ü kabz ve der-uhde ve iltizâm eylediği cizye evrâkının hesâbını sahîhan rü’yet ve mezbûrun makbûzâtından ücret ve masrafı ihrâc olundukdan sonra zimmetinde zuhûr eden dokuz yüz guruş deyni için işbu yedimde olan sene-i mezbûre Zilhicce’sinin gurresi târihiyle müverrah mümzâ ve mahtûm bir kıt‘a deyn temessüğü i‘tâ ve deyn-i mezkûru yirmi gün tamamında edâya dahi ta‘ahhüd etmiş iken hâlâ edâ etmeyip meblağ-ı merkūm zimmetinde kalmağla taleb ederim deyü takrîrine mutâbık mu‘anven ve mersûm bir kıt‘a deyn temessüğü ibrâzıyla da‘vâ ol dahi cevâbında ber-vech-i muharrer ikrâr ü i‘tirâf etmeğin alâ-mûcebi ikrârihî meblağ-ı merkūm dokuz yüz guruşun edâsıyla mezbûr es-Seyyid İsmail şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 28 min-Ra sene 1205