Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 409 Hüküm no: 423 Orijinal metin no: [97a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa b. Cafer ile kocası Hüseyin b. Ahmed’in muhala‘a yoluyla boşandıkları Muhâla‘a. Mahmiye-i İstanbul’da Mirâhor Mahallesi’nde sâkine Fâtıma bt. Mustafa b. Ca‘fer nâm bikr-i bâliğanın min-kıbeli’l-üm ceddesi ve tarafından husûs-ı âti’z-zikre vekîl olduğu yine mahalle-i mezbûre sükkânından olup mezbûrenin zâtını ârifân Halil Beşe b. İsmail ve Mustafa Beşe b. Mehmed şehâdetleriyle şer‘an sâbit olan Rukiye bt. Ahmed nâm hatun meclis-i şer‘-i hatîr-i lâzımü’t-tevkīrde müvekkile-i mezbûrenin zevc-i gayr-ı dâhili bâ‘isü hâzihi’l-vesîka Hüseyin b. Ahmed nâm kimesne mahzarında bi’l-vekâle ikrâr ve takrîr-i kelâm edip mezbûr Hüseyin ile müvekkile-i mezbûre beynlerinde kable’d-duhûl şikāk vâki‘ olmağın mezbûr Hüseyin zimmetinde ma‘kūdun-aleyh iki bin akçe mehrinin şer‘an lâzım gelen bin akçesi üzerine bi’l-vekâle muhâla‘a-i sahîha-i şer‘iyye ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her biri âharın zimmetini ibrâ ve iskât eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-şehri Ramazani’l-mübârek li-sene selâse ve erba‘în ve mi’e ve elf. Şuhûdü’l-hâl: Halil Beşe b. İsmail ve Mustafa b. Mehmed, Molla Hasan b. Mustafa, Okumuşzâde Ahmed b. Mustafa.