Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 347 Hüküm no: 439 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun Mescidi Vakfı’ndan borç alan Mustafa’nın borcunu kefili Ali Beşe’nin ödemesi Ma‘rûz Medîne-i Üsküdar’da vâki‘ merhûme Fatıma Hatun Mescid-i şerîfi vakfının mütevellîsi el-Hâc Mehmed Tâhir Efendi b. Osman Efendi medîne-i mezbûrede mahfil-i bâbda meclis-i şer‘-i hatîrde Ali Beşe b. Hüseyin muvâcehesinde gāib ani’l-meclis Mustafa b. Hasan nâm kimesne târih-i i‘lâmdan iki sene mukaddem mâl-ı vakf-ı mezbûrdan bi-tarîki’l-karz istidâne ve kabz eylediği elli guruş ve bâ-devr-i şer‘î iltizâm eylediği beher sene tamamında yedişer buçuk guruşdan iki sene tamamına değin on beş guruş ki cem‘an altmış beş guruş deyni mukābelesinde emlâkından olup medîne-i mezbûreye muzâfe Kartal nâhiyesine tâbi‘ Yakacık karyesi toprağında kâin ma‘lûmü’l-hudûd bir kıt‘a kürûmu mülk bağını vakf-ı mezbûr için bana vefâen bey‘ ve teslîm ve mezbûr Ali Beş dahi meblağ-ı mecmû‘-ı merkūma bi’l-emr ve’l-kabûl kefîl ve dâmin olmuş idi el-hâletü hâzihî meblağ-ı merkūm altmış beş guruşun kırk üç guruş bir rub‘unu mezbûrân Ali Beşe ve Mustafa yedlerinden ahz ve bâkī yirmi bir guruş otuz parayı mezbûr Ali Beşe’nin kefâletine binâen vakıf için bi’t-tevliye taleb ederim deyü da‘vâ ve mezbûr Ali Beşe cevâbında ber-vech-i muharrer ikrâr lâkin müdde‘î-i mezbûr kabzını mu‘terif olduğu kırk üç guruş bir rub‘dan mâ‘adâ üç guruş dahi yedine teslîm edip ancak on sekiz guruş otuz para deynim bâkī kalmış idi deyü ol-mikdârını ba‘de’d-def‘ ve’l-inkâr dâfi‘-i mezbûr Ali Beşe ber-vech-i muharrer def‘ini isbâtdan ızhâr-ı acz edip talebiyle mezbûr el-Hâc Mehmed Tâhir Efendi’ye yemîn teklif olundukda yemînden nükûl etmeğin mûcebiyle müdde‘î-i mezbûr el-Hâc Mehmed Tâhir Efendi ziyâde mutâlebesinden mezbûr Ali Beşe’ye bî-vech-i şer‘î mu‘ârazadan ba‘de’l-men‘ mertebe-i ikrârı olan meblağ-ı bâkī-i merkūm on sekiz guruş otuz paranın taraf-ı vakf için mezbûr el-Hâc Mehmed Tâhir Efendi’ye edâsıyla mezbûr Ali Beşe şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 11 min-Ra sene 1205