Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 410 Hüküm no: 424 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin tasarrufunda olan Okçubaşı Hayreddin Bey Vakfı’na ait arsada yapılan keşif Mine’l-keşşâf, bâ-imzâ-i hazret-i efendi. Husûs-ı âti’l-beyânın mahallinde keşif ve tahrîri için sâdır olan fermân-ı âlîye imtisâlen cânib-i şer‘-i hatîrden irsâl olunan keşif nâibimiz Mevlânâ Mehmed Abdullah Efendi hâssa mi‘mârlardan Yusuf b. Mustafa ve Mehmed b. el-Hâc Ahmed nâm halîfeler ile mahmiye-i İstanbul’da Sultan Bayezid kurbünde Kuşbâzlariçi demekle ma‘rûf mahalde Eminbey Mahallesi’nde vâki‘ merhûm Okçubaşı Hayreddin Bey Vakfı’ndan Mehmed Çelebi b. Mustafa’nın bi’l-icâreteyn mutasarrıf olduğu ma‘lûmü’l-hudûd arsa-yı hâliye varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde bâ‘isü’l-kitâb merkūm Mehmed Çelebi meclis-i ma‘kūd-ı mezkûrda vakf-ı mezbûra <> taraf-ı şer‘den kāimmimakām-ı mütevellî nasb olunan Ömer Çelebi b. Ali hâzır olduğu hâlde takrîr-i kelâm ve tâ‘bir ani’l-merâm edip işbu mutasarrıf olduğum arsa-yı hâliyenin üzerine mâlım ile binâ murâd eylediğimde arsa-yı mezbûre keşif ve mesâha olunup mikdârı ma‘lûmum olmak matlûbumdur dedikde mi‘mârân-ı mezbûrân Müslimûn-ı hâzirûn ile arsa-yı mezbûreye nazar ve mesâha eylediklerinde tûlen yedi zirâ‘ ve arzen dört bi-hesâb-ı terbî‘i otuz bir buçuk zirâ‘ arsa olduğunu mi‘mârân-ı mezbûrân ve Müslimûn-ı hâzirûn bi’l-ittifâk haber verdiklerini mevlânâ-yı mezbûr mahallinde tahrîr ba‘dehû ma‘an ba‘s olunan Muhzır Mustafa Çelebi b. Mehmed ve Çukadâr ( ) ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis min-şehri Ramazan li-sene selâse ve erba‘în ve mi’e ve elf. Şuhûdü’l-hâl: Mehmed Efendi b. Musa el-imâm, el-Hâc Ahmed Ağa b. Beşir Ağa, Abdullah Çelebi b. Mehmed, Müezzin Mehmed Efendi b. Hüseyin, Ahmed Ağa b. Mehmed bevvâb-ı şehriyârî.